O le galuega faaleoleo o le Malo ose auaunaga ma se tautua e tele iai faitioga. E le ‘asa se aso ma finagalo siisii faasaga i Malu o le Malo pe a oo ina iai ni faaletonu i le faatinoga oo latou tiute aemaise lava pe a atagia ise tiute o leoleo ua faaitu’au pe ua le faia le mea e tatau ona fai. Peitai e mafai ona tatou faapea e soo se tautua ma se auaunaga i soo se tomai e le ‘alo i ai faitioga ma upu tau faifai a nisi pe a oo ina utia ma lagomia finagalo ise faaletonu ua aliali mai. I le galuega a leoleo e manino pea i tausaga uma e tiga ona tele iai faitioga ae e lē o solomuli ai loto o nisi o tamafanau a le atunuu e fia tautua ma avea ma Malu o le Malo.
O tausaga uma e le faaitiitia le maualuga o le numela o tama ma teine talavou e fia talosaga e avea ma leoleo. O tausaga ua mavae sa fai le suega e saili ai i latou e ausia tuutuuga ma aiaiga o manaoga o le galuega faaleoleo, ao aso nei ua ave le tusi talosaga e faailoa uma ai agavaa ma faailoga o loo umia poo ni tomai tau galuega o loo galue ai ona fai lea iai o le filifiliga.
O tausaga e tele foi ua mavae sa manino o le toatele o latou e maua lea galuega e iai sootaga ma piitaga i ni leoleo sinia poo nisi foi ua galulue faaleoleo ona oo latou tuaa ma matua o loo umia ni tulaga maualuluga i le Matagaluega.
O lea ua iai le faiga faavae fou a le Malo ua le toe talia ai le galulue faatasi o se leoleo ma sana fanau poo se ulugalii oni leoleo uma. I le aso Faraile ua mavae e toa selau sefulufa alii ma tamaitai na faatauto i luma o le faamasinoga mo le tauaveina o galuega ma tiute faaleoleo. O le toatele lava oi latou e talavou le soifua ae o nisi ua tino i matutua ua maua le 35 i le 40 faasolo atu i le 50 tausaga o le soifua.
O le taimi muamua lenei ua oo ai se suiga fou o leoleo i le 114 e pei ona faailoa e se leoleo satini i le vaega o loo faia aoaoga mo galuega faaleoleo.
O lea aofaiga ua aofia ai tamaitai e fasefulu ao le isi vaega toatele o alii. Na ave le faamalo a le afioga i le Faamasino o le faamasinoga faaitumalo, Fepuleai Ameperosa Roma iai latou ua faatauto ona o lo latou loto nuu ua faaalia ilo latou fia galulue o ni Malu o le Malo. “O le tou tautoga o loo manino ma e tatau ona savavali ai e pei foi o a’u i la’u tautoga e ui e eseese o tatou tiute tauave”, o se vaega lea o le finagalo o Fepuleai.
Na momoli le teutusi o se seleni o le meaalofa a le vasega fou o leoleo mo le alii faamasino ma le teutusi mo le alii lesitala o le faamasinoga na faatautaia le faatautoga. Ua molimoli atu i lea faaaloalo lo latou loto faafetai ona o le galuega sa faatautaia o le faatautoina oi latou.
O le ogatotonu o le vaiaso nei ua faia ai le faauuga a le vasega fou o leoleo ma ua laei ai ma o latou toniga leoleo ua leva ona moemiti ua tuai ona oo mai le taimi e silasila atu ai o latou aiga o uo ma aumea mamae ua laei mai le toniga leoleo.
