O le siitaga o totogi mo tagata faigaluega a le Malo lea ua faatulaga e maua i le aso muamua o le masina fou o Iulai, e lē o aofia ai tagata faigaluega i pisinisi ma kamupani tumaoti.
E ui ina lē afea i lea siitaga tagata faigaluega i le private sector, peitai ua silasila le pulega o le kamupani o le Yasaki i Vaitele, ua tatau ona faia se siitaga mo totogi o ana tagata faigaluega lea o loo $2 i le itula i le taimi nei.
Ua faaalia e le alii pule o Funefeai Oliva Vaai, o loo fuafua e faaopoopo le 40 sene. Afai ae taunuu lea fuafuaga ona laina tutusa ai lea ma le totogi maualalo o tagata togiaso a le Malo e $2.40sene i le itula o loo iai i le taimi nei.
O le lē aofia o tagata faigaluega i pisinisi ma kamupani tumaoti i le siitaga a le Malo, ona sa finauina e le faalapotopotoga a le au faipisinisi le lē talafeagai o se siitaga e aafia ai i latou, pe a fua i tulaga faaletonu o le tamaoaiga o le lalolagi i le tausaga ua mavae lea na aafia ai a latou tupe maua.
Ua ogatasi le fuafuaga lea a le kamupani ma le vāea mai Amerika Samoa o le toatele o tagata mai Samoa Tutoatasi sa galulue i le fale tuuapa i‘a o le StarKist, auā afai ae toe taliu i aiga i Samoa, o le a faaosofia le fia galue pea pe a maua ni avanoa i le Yasaki auā o le a maua se siitaga faaopoopo o le totogi e pei ona fuafuaina e le kamupani.
O le Yasaki Samoa e pito toatele tagata o loo faigaluega ai e silia i le 2,000.
O le tausaga ua mavae na tapunia ai le isi fale tuuapa i‘a i Amerika Samoa, ma o le toatele foi o ana tagata faigaluega e mai Samoa Tutoatasi. Ua toe foi uma mai i le atunuu le toatele o i latou ma ua maua galuega i nisi o pisinisi ma kamupani.
O le siitaga o totogi a le Malo e pei ona pasia i le tala autū o le tupe e lē o aofia ai se siitaga mo tagata faigaluega i pisinisi ma kamupani tumaoti poo le private sector.
Peitai o le Yasaki Samoa le kamupani muamua ua na faailoa le faia o sana ia lava siitaga mo totogi.
