Ua iai nei se fuafuaga e toe gaosi le sukalati i Samoa nei. O le kamupani lava lea na gaosia le sukalati ma faatau atu i fafo i tausaga ua mavae, lea ua toe agai nei e faatuina se isi nofoaga fou mo le gaosia o lea oloa i Samoa. O le Wylex Samoa lea na faatamaia uma lona nofoaga na gaosi ai le sukalati i le tausaga e 2003.
Ua tele tausaga talu ona taatia mai lea fale ina ua faaleagaina, ae na ta‘ua e Eddie Wilson, lea na pulea lea kamupani i Moataa, o lea ua mae‘a ona toe faatalatalanoa le au fai togakoko i Samoa mo le fuafuaga ua faataatia nei. Faaalia e le alii pule, o le fuafuaga ua iai ina ia oo atu ia Fepuari poo Mati o le tausaga fou ua mafai ona toe faagaioi galuega mo le gaosiga o le sukalati, ma o le taulai o le a agai lava i le faatau atu o lea oloa i atunuu mamao.
Talu ona faatamaia le nofoaga gaosi sukalati a le Wylex, na tele faamasinoga na laga ai le mafuaaga o le mu tele lea i le 2003 ma faaleaga atoa ai lenei pisinisi. E ui i ia faigata o lea lava ua manatu le Wylex ua tatau ona toe laga lenei oloa, ona e leai lava se isi o gaosia i Samoa le sukalati.
O le Wylex o i latou foi na faapea ona avea le ‘ava Samoa i Europa, gaosia le pauta tamea ma le fasimoli taele, ma o i latou o loo gaosia nisi o atigipusa ma pepa iila e faaaogā i ia atigipusa.
O le finau o le Wylex lea la ua toe vaaia i fuafuaga o le fale sukalati o le a toe faatuina i Samoa ma ua iai masini ua taunuu mai mo lea faamoemoe.
