Sauni le Worship Center faatau se masini fua ai malosi o leo

Ua avea le le faamalieina o le taitaiga o le ekalesia Worship Center i le faatinoga o le galuega a le vaega o pulega o taulaga le PUMA i le fuaina o le maulauga o leo o a latou mea faifaaili ma leo o pesega ma sauniga, ua tapena ai nei le ekalesia e faatau mai se latou masini e fua ai le malosi o le leo ma le pao mai ia latou sauniga o loo aafia ai le filemu o turisi o loo nonofo i le faletalimalo o le Millenia i Sogi. I se feiloaiga ma tusitala na faaalia ai e le taitai o le ekalesia, susuga Viliamu Mafoe, ua tele le aafiaga o a latou sauniga i le faaiuga a le faamasinoga lea ua taofi ai a latou tapuaiga o le Aso Sa, ona a fua i le silia i le toa afe o tagata lotu e le maua se hall poo se maota tele e ofi uma ai.
Ua saga finauina pea e le faafeagaiga le le amiotonu o le suesuega a le PUMA na fai, lea na ave ai se latou lipoti i le faamasinoga ma aumai ai le faaiuga, ona e lei oo atu sui o le PUMA e faailoa atu le malosi o le leo mai a latou sauniga. O le tasi itu o loo silasila i ai le ekalesia o le faia lea o se talosaga e tuuina atu i le Malo ina ia toe iloilo le tulafono o loo fua ai le maualuga o le leo ma le pao e tatau ona usitaia e tagata uma, ona o le finagalo o le susuga Viliamu e tele le afaina o le maualuga o le leo o loo faatulafonoina mo le faatinoga o sauniga lotu a isi ekalesia e tutusa le faatinoga o a latou tapuaiga ma le Worship Center.