E latalata i le 200 aiga Samoa ua iai nei i totonu o le polokalame a le kamupani ua faaigoaina o le Vaa o Noa (Noah’s Ark). O le faamoemoe o aiga e pei ona ta‘ua, aemaisae ai o fuafuaga alualu mamao ma le poto a lea foi kamupani, o le sauni lea e faatauina atu ma saili ni fale faatau motu mo aiga taitasi ua iai i totonu o le polokalame.
O se faiga ua matuā talitonuina e le toatele o aiga ua iai i lea fuafuaga, ona ua latou faamaonia mai foi i le Samoa Times le tāua tele aemaise ai o le lava tapenaina o i latou mo le taimi talafeagai e saili ai ma faatau se fale motu mo le lumanai.
O le tele o kamupani o loo faagaioia lea foi auaunaga, e oo lava i kamupani tetele e faapitoa mo lea auaunaga, e tulaga ese mai lava le Vaa o Noa, pe a fuafua atu i le faatautaia o le polokalame mo aiga. O le tele o kamupani e faatali i le agai atu i ai o tagata, ona faato‘ā gaioi lea e saili le mokesi ma saili se fale talafeagai.
A oo ina saili atu ua faaletonu le totogi aitalafu a le mamalu o tagata o loo agai i ai, ona lē maua lea o se fesoasoani. Peitai o le Vaa o Noa, ua tulaga ese le faagaioia o le auaunaga o loo iai. E amata mai lava ona fesoasoani le kamupani mai lava i le amataga, i lona tau sefeina ma le faasaoina o seleni, e oo lava i le taimi ua talafeagai e faataunuu ai le faamoemoe.
O se faiga e pei lava ona faamaonia mai e le toatele o aiga Samoa, le aogā tele, aemaise o le faasaoina o tupe mo lea faamoemoe. O teuga tupe uma o loo faia i vaiaso taitasi, o loo lelei ma malupuipuia lona vaaia ma le teuina, seia oo lava ina faatupulaia ma sauni loa e faaaogā mo le faamoemoe lava e tasi, o le faatuina o le fale.
E tai tolu masina ma toe feiloai le kamupani ma aiga o loo teutupe i le polokalame, o le mafuaaga o le toe vaavaai ma toe siaki poo lelei ona faasoasoa seleni i vaiaso taitasi, aemaise ai o le fautuaina pea ina ia taumamao ese mai le toe faia o nisi nonoga tupe, auā lava le puipuia mai o suafa mai le faaletonu i le totogi aitalafu.
O se feiloaiga foi ma le susuga i le faatonusili o lea kamupani, na ta‘ua ai ma molimau le susuga ia Luke, i le fiafia tele e vaavaai atu i le lelei ma le agai pea i luga o faaputuga tupe a nai aiga, ona o le faamoemoe lava o le fia faatauina o se meatotino a le aiga mo le lumanai.
Sa ta‘ua foi e Luke o le 30% o aiga o loo i totonu o le polokalame, ua iai nei i le tulaga manuia mo le faataunuuina o le miti, talu ai o le faatuatuaina ma le galulue faatasi ma le kamupani, talu lava ona amata mai le teuga tupe.
O le ala foi lea ua toe fuafua ai nei le kamupani, e toe foai le isi meaalofa e $10,000 mo le tagata o le a manumalo i le se‘i o lenei foi tausaga. O le manumalo tupe e pei ona fuafuaina, o le a tuusao lava ma faaopoopo i le tiposi a le aiga o le a faamanuiaina.
O lea faamoemoe sa faia foi i le tausaga talu ai, ma ua manatu le alii pule ma le pulega, o le a toe faia foi i lenei tausaga, o se taui e faailoa atu ai le agaga fai paaga lelei o le kamupani mo ana uo mamae sa faaaogāina le auaunaga.
O teugatupe uma o loo faia e le polokalame, e lē mafai ona talaina ese mai i soo se isi lava manaoga o le tagata e ona le seleni, se‘i vaganā lava ua sauni e faatau le fale, auā o le faamoemoe ma le autū tonu lea na mafua ai ona teu ma faasao le tupe.
O loo faagasolo pea fuafuaga ma faiga masani a le Kamupani mo le fesoasoani mo tagata Samoa, ma soo se tasi e tau fonofono ai manu‘a tetele o le toatele o aiga, talu ai faiga sauā ma le matautia a isi kamupani sa faia ia ituaiga galuega, peitai sa faia ma le lē alofa ma sa lei vaai i le tigaina o tagata lautele.
O le Vaa o Noa o loo iai lona ofisa autū i Grey Lynn, ma le isi ona lālā i totonu o le taulaga faatau i Otahuhu e sosoo ma le New Zealand Post.
O le ofisa i Otahuhu sa maitauina le pisi tele ona o le toatele o le mamalu o le atunuu, sa agai ane i ai i le vaiaso talu ai. Ua saoasaoa tele le agai i luma a lea foi auaunaga, ona o le faamaoni ma le lelei ona fuafuaina, o ana gaioiga e fesoasoani ai mo manaoga o aiga Pasefika aemaise lava o tagata Samoa.
