Sauni le tamaitai Salafai mo le Tausala o le Teuila

O le tamaitai ia Anastasia Titi Smith – o se alo faasino ia Seepa ma Titi Smith mai i le afioaga o Safotu i Savaii lea ua pale mai o le tausala o lea afioaga mo le faamanatuina o le Tutoatasi o Samoa i le tausaga e 2012/2013.
O le tauvaga tausala lea na faapea ona taualuga ai se aso atoa o fiafia a le afioaga i le latou foi sao o le faamanatuina o le Tutoatasi o Samoa i le atoaga o lona 51 tausaga.
O taavale teuteu, o tauvaga savali a le fanau aoga, o faafiafiaga Samoa, tauvaga Pese ma tauvaga akapela, o taaloga aemaise o le tauvaga tausala lea na faaiu ai lea aso faamanatu i lea itu o le motu tele.
O le faaaliga la lea na faapea ona tauva ai tamaitai e toafā o le afioaga o Safotu ma o le faagasologa o lenei taamilosaga na faatautaia i se auala ua tali tutusa lelei lava ma le faaaliga tausala a Samoa lea e ta‘ua o le Miss Teuila i tausaga taitasi.
O vaega lautogia o lenei tauvaga na aofia ai le Faatalatalanoaga, o le Taleni, o le laei ta‘ele, laei faaleaganuu ma le laei puletasi o le tamaitai tauva.
O le faatumulia o le afioaga i ona tagata aemaise o le mamalu o le auvalaaulia na saga faalauiloa ai i vaega eseese o le motu tele i Salafai lenei taumafaiga.
O le tamaitai la na manumalo i lenei tauvaga tausala o le tamaitai lea o Malia Niupulususu lea na sola ma le faatalatalanoaga (interview) Taleni ma le Ofu Ta‘ele. O le laei Samoa na sola ma Seepa Tolutasi ma le Puletasi na sola ma Rosa Luaai mai i Paia.
O lea la ua ofo mai le Ofisa malaga a le tasi o Faamasino sa auai atu mo lenei faamoemoe, o Katie Moananu o le K&M Travels na te faaulu ma lagolago le tamaitai tausala o Safotu i le Tausala o le atunuu lea e ta‘ua o le Miss Teuila ia Setema o le tausaga nei.
Faaalia e Luafia Katie Moananu, e maeu foi     le matagofie o sauniuniga a Safotu mo lea tauvaga aemaise o le aso faamanatu atoa lava o le Tutoatasi.
O faailoga foi na maua e tamaitai mai i lea tausinioga, na ia ta‘ua ua leai lava ma se eseesega ma le tauvaga tele lea a le atunuu i le faatāua ua ave i le Teuila.
O lona manatu a tele le lagolago e ave i tamaitai o le motu tele, e mafai lava ona tausinio Salafai i tausaga taitasi i le sailiga o le Tausala o Samoa.
O lea la ua fuafua le K&M Travels e faaulu le latou tausala mai i Safotu i le vaiaso lenei auā le alo atu ai o le Pulega o Tagata Tafafao Maimoa mai i fafo ma lenei foi tausaga o tausinioga e lē gata i le Teuila ma ona polokalame eseese ae o le sailiga o le lalelei o Samoa i le Tausala o le Teuila. O le itu mautinoa o lea ua iai le sui o Puleono a o lei faamautu ai sauniuniga o lea tauvaga tausala o lenei tausaga.