I se fono faalauaitele a le ofisa a le Manukau Institute of Tecnology (MIT) ma le toatele o sui mai le komuiniti o le Pasefika e pei o Ekalesia, Faiaoga, ma Faalapotopotga, na fofola mai ai e le aufaigaluega o loo nafa ma le va i fafo, la latou tautua o loo faatino, e tāua mo tagata Pasefika i totonu o le Aoga o Matata Eseese i Manukau.
Na faailoa e le Faatonu o le Va i Fafo, Dr Stuart Middleton le faamoemoe tele a le MIT o loo fuafua e faataunuuina i le tausaga 2012, o le fauina lea o se Nofoaga Tutotonu mo le a‘oa‘oina o tagata Pasefika, ua faaigoaina o le MIT Pasefika Centre.
O se Nofoaga autū muamua lea i lona ituaiga i totonu o Niu Sila. E 500 tagata e mafai ona ofi ai.
O le a a‘oa‘oina ai soo se ituaiga matata eseese e aogā ma patino lava mo tagata Pasefika.
Na taitaiina e le tamaitai pule, le afioga ia Toleafoa Sina Aiolupotea Aiono le fonotaga, o ia o loo umia le tofiga o le Manager Pasifika Development i le itu o le va i fafo (External Relations) a le MIT.
Saunoa Toleafoa, o le 20% o le aofaiga o tagata aooga i le MIT, o tagata Pasefika, e tusa ma le 5100, ae o le 13% o faiaoga Pasefika.
O nisi o galuega o loo faasolo nei a le ofisa na faailoa mai, o le galulue vavalalata lea ma fai paaga ma aoga i atunuu i fafo, e pei o le BYU i Hawaii, NUS i Samoa, ma le IT i Tonga.
O se tasi o vasega tāua na faailoa mai, o le Centre for Studies in Multiple Pathways, le CSMP, o le a a‘oa‘oina ai faiaoga mo Aoga Amata i le mataupu Sikolasipi a le ECE, e leai se totogi.
E tele ma anoanoai avanoa tāua mo le a‘oa‘oina o tagata Pasefika i totonu o le MIT, ma ua toatele foi i latou ua faamanuiaina mai ai a latou a‘oa‘oga.
