Sauni le Manusina e sailimalo i Sepania

Ua lauiloa Samoa i le lalolagi i lenei faagatama o le lakapi, o se taaloga  ua leva foi ona ma ua autausagā o auai ai Samoa i le tele o taamilosaga e faaalia ai le agavaa tele o ona tagata i le faatinoina ae o se taaloga e ese ma le fiafia i ai e lē gata o le itupa o alii ae faapea foi  le itupa o tamaitai i lenei talutalufou ua iai.
Ua soo le lalolagi i lenei lava taaloga o le Lakapi o faamaite mea ai foi se Samoa.
Ua saili foi i le tumutumuga o lenei lava taaloga o loo finafinau ai foi Samoa, e taumua tutusa ai ma le itupa o tamaitai aemaise ai foi le tulaga o aafia ai i taaloga ua faapolofesa ai ma ua maua ai seleni lelei e tausia ai aiga ma maua ai le lumanai lelei o le toatele o alo ma fanau. I le afiafi la o le Aso Toonai na se‘i mavae atu, sa faataunuuina ai se taumafataga faavae saili seleni na tapenaina e le Iuni Lakapi a Samoa i Aukilani (Auckland Samoa Rugby Football Union) i Niu Sila e fesoasoani ai i le nofo sauni o le ‘au a tamaitai le Manusina, e finauina se avanoa o Samoa i le taamilosaga o le Ipu o le Lalolagi mo le tausaga 2014.
O se avanoa faaauro lenei e atili siitia ai le igoa o Samoa i atunuu i fafo. Ma pe afai ae manuia le taumafai a le Manusina, e mautinoa foi e faamauina i talafaasolopito o lenei taaloga le auai ai o Samoa. Sa faatumulia le nofoaga le Otahuhu Rugby Club i aiga ma uo, o sui o le atunuu ma pisinisi sa auai e faaalia lo latou lotonuu moni, faamalosiau foi i ē ua filifilia mo le malaga ese atu mo taaloga e tolu, o loo tumau le faatuatuaga o le faiaoga autū e mafai mea uma i le mau “e au le inailau a tina ma tamaitai”. O saunoaga autū o lea afiafi sa saunoa i ai le susuga i le Faafeagaiga EFKS i Otahuhu ia Rev Ata Milo i tapenaga faaleagaga a le tamaitai taalo i lona tāua ma le siosiomaga o avanoa e faasili ai lona Atua, atili siitia ai lona tulaga ma maua ai faamanuiaga e tausia lelei ai aiga ae faasili ai lona Atua, sa saunoa foi le Konesula Aoao o Samoa i Aukilani, Faolotoi Reupena Pogi e fai ma sui o le Malo o Samoa i lea faamoemoe i saunoaga faamalosiau i tamaitai i le tulaga e sailimalo ai mo lona atunuu o Samoa. Sa faatasi ai foi i lea po le Peresetene o le Asosi Lakapi a Tamaitai i Samoa, le afioga ia Toleafoa Mara Hunter, le alii ma le tamaitai faipule, Susuga Su‘a William Sio ma le Afioga Leaufaamulia Asenati Taylor, faapea foi le Komesina o Fefaatauaiga a Samoa i Niu Sila, Fonoti Dr Lafitai Iupati Fuatai.
O se afiafi matagofie felanulanuai e lē gata i faafiafiaga a o le laufofoga fiafia o le toatele faatasi ai ma le taumafataga matagofie o lea po. Sa saunoa le taitaimalaga a le Manusina e  momoli le agaga faafetai ma le faamalo i Sui o le Malo Samoa ma tagata lautele aemaise le auvalaaulia filifilia o lea po.
E silia ma le $4,000 tala se seleni sa mafai ona tuufaatasia i lea afiafi e lagolago ai i sauniuniga ma tapenaga a le Manusina a o lei malaga ese atu mo Sepania i le vaiaso nei.
Masalo afai o le a a‘e manuia le taumafaiga mo lea faamoemoe, e mautinoa e sili ma matagofie se faataliga o le tatou ‘au i le taimi o le a toe taliu mai ai. Se‘i tatou tapuaia le sailigamalo a le Manusina ina ia a‘e ma le atoatoa faiva i le tapuaiga a Samoa.