Sauni le Malisi Niu Sila e Talimalo mo le Malisi Samoa

I le atoa ai o le 50 tausaga talu ona faavaeina le Faalapotopotoga o Tama ma Teine tuai o le aoga Malisi Samoa Niu Sila, le Marist Brothers’ Old Pupils Association MBOPA Samoa NZ, ua a‘e ai se manatu i le faalapotopotoga o le a talimalo i se Malaga saili tupe a le Malisi Samoa – Marist Brothers’ Old Pupils Association Samoa MBOPA Samoa.
O lenei fuafuaga e faamoemoe e faailoga faatasi ai ma le faamanatuina o le 50 tausaga talu ona faavaeina le faalapotopotoga i totonu o Niu Sila.
O se tasi o galuega faatino a le faalapotopotoga ua ausia auā lona faamoemoe o le tofia lea o se komiti faafoe auā le tapenaina o le polokalame mo le 50 tausaga o le Asosi i Niu Sila. O lenei polokalame o loo fuafua mo se vaiaso se tasi, e amatalia mai le aso 8 – 15 Tesema.
O lenei Komiti Faafoe o loo faauluulu i le Afioga Faimalo Allan Stowers, o se tasi o alii faipisinisi i totonu o Aotearoa Niu Sila faapea Samoa, o ia foi o se sui tuai o le aoga a Malisi.
Ta‘ua e le Afioga a Faimalo, o le faamoemoe o le Asosi ua talafeagai tonu lea ma le faamanatuina foi o le 125 tausaga o le Malisi i totonu o Samoa. Sa ia faailoa mai foi, “E lagona le agaga fiafia ina ua mafai ona tofia se tamaitai e galue i totonu o se Komiti a le faalapotopotoga mo le uluai taimi muamua, talu mai talafaasolopito o le faalapotopotoga.
O se faailoga lea ua tatau ona agai le Asosi e tapue mai le toatele o isi tamaitai tuai o le Malisi e auai mai i meafai a le faalapotopotoga aua le aga‘i i luma.”
E tele ni fuafuaga o le a faailoa mai e le Komiti i se taimi o lumanai, ua mae ‘a ona faataatia auā sauniga o le faamanatuina o le 50 tausaga o le Asosi.
O le faamoemoe autu ina ia sailia mai ai se seleni e faamatuu atu i le Malisi Samoa mo le faamae‘aina o se poloketi ua mae‘a ona amatalia e le Malisi Samoa mo alo ma fanau o loo aotauina i le aoga a Malisi i Mulivai.
E oo atu i le $1.5miliona Tala Samoa le aofaiga atoa o le poloketi. E aofia ai le Science Lab, o se Computer Lab ma le Library mo le aoga.
Ua mae‘a ona totogiina atoa le $1.1miliona tala o lenei poloketi. Ma o le faamoemoe o le Asosi ina ia sailia se seleni e fesoasoani ai i le totogiina atoa o lea vaega.
Faaalia e le susuga Felela Brother David Lavin, o se avanoa tāua ma le matagofie lenei mo le tama ma teine tuai o le Malisi e toe faatasitasi ai ma maua le spili faa-Malisi.
Ae faasilisii ai le maua lea o se avanoa e fesoasoani atu ai i le aoga sa aotauina ai, aemaise le lumanai o le fanau i Samoa.