O teuteuga i aiaiga o le tulafono faaleoleo i le sailia o se tasi e avea ma Komesina o le Matagaluega o leoleo, ua faatino mo le taimi muamua talu ona pasia ia teuteuga i le tausaga e 2014 i le filifilia o le susuga Egon Keil, o se alo o Samoa e 17 tausaga o galue i le matagaluega o leoleo i Los Angeles i Amerika.
O lona uiga o lea ua filifilia le komesina mai ia i latou na talosaga e lē o galulue i le matagaluega o leoleo a le Malo o Samoa, ae sa galue i se auaunaga faaleoleo i se isi atunuu. Ua mautinoa i le filifiliga ua faia le manaoga o le Malo ma le atunuu ua tatau ona faia se suiga i lē na te vaaia ma pulea lea tautua taua a le atunuu ma le Malo. E faavae ia lagona i le tele o faaletonu ua tutupu ma aliali mai i le faatinoga o le auaunaga a le vasega o le Malu o le Malo.
O le susuga Egon sa aoaoina i le aoga maualuga a Leifiifi ma le Kolisi o Avele, a o lei tuua Samoa ma malaga i Amerika e faamautu ai ma le faalauteleina pea o lona olaga aoaoina e pei ona sa faamanuiaina i ni faailoga tikeri mai se Kolisi poo se aoga e aoaoina ai tomai faaleoleo i le Setete o Hawaii, faapea le faailoga o le Bachelor of Science in Criminal Justice Administration mai le Iunivesite a Kalifonia, ma e iai foi isi ona faailoga faapitoa i tulaga faaleoleo ma isi ona faailoga na maua mulimuli ane ai e faasino lava i lea tomai faapitoa.
I se pepa o faamatalaga mai le ofisa o faamatalaga a le Malo le press secretariat ua ta‘ua ai e faapea, e tofia nei Egon e avea ma Komesina o le Matagaluega o Leoleo o loo galue i le Komiti Faatonu a le Pulega o Auaunaga o Tinei Mu ma Faalavelave Tutupu Faafuasei.
O le tausaga 2005 i le 2012 na galue ai i le Matagaluega o Leoleo a Los Angeles, Kalifonia i le Iunaite Setete o Amerika i le tulaga o le Satini II poo le Assistant Watch Commander. O le tausaga e 2001 i le 2005 na galue ai i le tulaga o le Satini i le Field Patrol Supervisor. Na amata lana tautua i le Matagaluega i le tausaga 1995, i le mae‘a ai lea o le tausaga e tasi na galue ai i le Matagaluega o Falepuipui a le Setete o Utah.
Na ulufale ai loa ma galue i le matagaluega o leoleo i Los Angeles le L.A.P.D (Los Angeles Police Department). Faatoa tolu tausaga ma masina talu ona toe foi mai i Samoa ma faia ai sana pisinisi o se auaunaga e siaki ai afi o taavale lea e ta‘ua o le Speedy Auto Care i Savalalo.
I se avanoa na faatalatalanoa ai lana susuga, na ia muamua faailoa lona faafetai i le Palemia ma le Malo faapea le afioga i le Ao o le Malo ona o le filifiliga ua tofia ai o ia. “Ou te matuā fiafia lava i le avanoa lenei auā na ou iloa ina ua faasalalau le avanoa, o lo‘u taimi lenei e faia ai sa‘u tautua i le Malo ma le atunuu”.
Faaalia foi e Egon o le laualuga foi lea o ana fuafuaga i lona valaauina o le faia o suiga i le matagaluega o leoleo ina ia toe faatonutonu lelei ai le Sa o le faatinoga o galuega ma tiute o alii ma tamaitai leoleo. O le itu sili ona tāua na ia faailoa, o le tautuaina o tagata e aunoa ma le iai onio faiga faaalatua ma nisi faiga e faaituau ai i ni tagata poo se ituaiga o tagata.
O lana mau ia faia le mea amiotonu ma ia mautali atu leoleo ma ia o le komesina pe a oo ina iai ni faaletonu e aafia ai le auaunaga. O lana mau foi e tatala le faitotoa i soo se taimi i le vasega o tusitala ma le au faasalalau poo le media, e fesootai atu ai i ni mataupu e manaomia ai se faamatalaga mai le matagaluega.
O suiga ua ia faailoa e aofia ai le silasila toto‘a i le filifiliga o alii ma tamaitai e tatau ona ulufale i le galuega faaleoleo. O le finagalo o le Komesina filifilia fou o leoleo, e iai lava ituaiga o tagata ua iai le mafaufau ma le lagona moni e fia tautua ai i le galuega auā e lē o se auaunaga e faigofie pe na ona faataga fai.
E lē faigofie le galuega o le a faatino e pei ona tautino mai le susuga Egon ae e manaomia le lagolago atu o i latou o loo umia tulaga sinia i le galuega faaleoleo mo le faatinoina o suiga e iai lona talitonuga o le a sologa lelei ai le tautua a le matagaluega o leoleo.
O Egon Keil o se alo e faasino i se tasi o tamalii lauiloa i pisinisi i Samoa le afioga Maposua Rudolf Keil, ma le tina ia Tualagi Rasmussen. E pei ona lausilafia e le mamalu o le atunuu le afioga Maposua Rudolf Keil lea e umia ma faagaioia le leitio faasalalau o le Radio Polynesia ma o le leitio muamua foi i Samoa na faasalalau i le alaleo o le FM.
O le Susuga Egon e mai alalafaga o Malololelei, Malifa, Manono ma Palauli ma e toalua ona alo. O ia foi o se sui o le Ekalesia Mamona i Motootua.
