O fale palota faapitoa mo itumalo i Savaii ma Upolu e faaaogā e tagata palota o nonofo ma alala i le talafatai o Apia, o le a lē toe faagaioia i aso o faigapalota tetele a le atunuu ma palota laiti e sailia ai tofi faipule o itumalo i le Palemene.
Ua iai molimau malolosi ua molimauina ai le avea o ia falepalota faapitoa ma faitoto‘a e saofia ai faiga faaalatua ma solitulafono a nisi o sui tauva ona o le fia maua o le manumalo.
O le palota tele o le 2006 na molimauina ai lea tulaga ina ua sau le faaiuga mo nisi o sui tauva e sili atu ona tele a latou palota na maua i fale palota faapitoa i Apia pe a fua i le numera o palota na maua i fale palota i totonu o o latou itumalo faafaipule.
O le palota tele o le 2006 na filifilia ai e le faigamalo a le HRPP o loo iai nei se komisi e toe iloiloina le tulafono o faigapalota.
O fautuaga a lea komisi ua mae‘a ona tuuina atu i le Palemene o loo faaalia ai atugaluga i faiga faaalatua a sui tauva i le lesitalaina o tagata palota e leai ni piitaga ma sootaga i itumalo faafaipule.
O se tasi foi o fautuaga na tuuina atu e lea komisi o le tapunia lea o fale palota faapitoa ona o nisi o faiga piopio na aliali mai ai i le palota o le 2006.
Ua toe faailoa e le Palemia, susuga Tuilaepa Lupesoliai Sailele Malielegaoi le toe faia o se isi Komisi suesue pe a toe manumalo mai le HRPP i le palota tele o le tausaga fou 2011, e taofia ai fale palota faapitoa. Ua faaalia foi e le taitai o le Malo le toe iai ma nisi suiga i le tulafono o faigapalota, o le a faia e lana vaega faaupufai pe a toe manumalo mai.
O le palota laititi a Safata na faia i le lua vaiaso ua mavae sa molimauina ai le toe filifilia o le afioga Palusalue Faapo II, lea na manumalo mamao i le aofaiga o palota na ia maua i le fale palota faapitoa mo Safata i Apia.
O le toe faailoa e le Palemia o le taofia o fale palota faapitoa ua lipotia ai se finagalo o Palusalue Faapo II ua ia faitioina ai le Malo i le toe faia o se isi komisi suesue e faatino ai lea tulaga.
O le finagalo o Palusalue, e maumau le taimi ma maumau tupe a le atunuu e faia ai se komisi suesue, ae e pule lava le HRPP ma lana taupulega i le mea e fai. O loo atugalu foi lea sui faipule i le taofia o fale palota faapitoa, ona o le avanoa lea mo tagata palota o itumalo tau mamao e agai i ai.
O le tasi itu na faaalia e lea sui faipule o Safata o le tau malaga mamao i Savaii ma nuu i tua o tagata palota o nonofo ma alala i le talafatai o Apia.
O le finagalo o le Palemia, e tāua le o uma o tagata e palota i o latou nuu ma itumalo sei silasila ane i ai tagata o loo nonofo i nuu ma fai le monotaga ma le tautua, pe o ni tagata moni ia e iai ni sootaga i aiga ma tagata o nuu.
