Ua malosi le malulu ae vevela tapenaga ma koleniga o le tau faaiuiuga o le taamilosaga o le Super Rugby i lenei tausaga 2014, ma ua faamae‘a i le faaiuga o le vaiaso na tea nei Semi Finals sa finauina ai ni ‘au se lua aua le sailiga siamupini i le faaiuga o le vaiaso nei.
Peitai pei ona silafia o lea ua totoe mai nei le ‘au e tasi a Niu Sila le Crusaders ma le ‘au mai New South Wales le Waratahs lea o le a fetaui e saili le auro moni o le a sola ma le manumalo o le taamilosaga i lenei tausaga.
O le a faatolu ai lea ona fetaui i le Final ‘au nei e lua ma e lei ea lava le pologa o le Waratahs talu ona taaalo ma le Crusaders i se sailiga siamupini.
Taamilosaga muamua na Final ai i le Super 12 o le 2005, manumalo le Crusaders, toe fetaui foi i le 2008, toe faavavai foi e le Crusaders si ‘au, lea la o le a toe sauni i le faaiuga o le vaiaso nei, o le tupua taumate la lea.
O le a lē manofonofo ai le finau o ‘au e lua, auā o le Crusaders o se tasi o ‘au malosi o le taamilosaga, ma ua fai foi si leva e lei toe pale mai i le ipu o le manumalo talu le tausaga e 2008 a o avea le taamilosaga ma Super 14, ae afai ae toe suipi i le Final lea o le a sauni atu i ai, o lona uiga o le taimi muamua lea o le a manumalo ai le Crusader i le taamiloga o le Super 15.
E fai si vala o le eseesega o le malolosi o ‘au nei e lua pe a faatusa atu i le talaaga o le Crusaders, e faafitu ona manumalo i le taamilosaga talu ona faavae le Super Rugby, manumalo i le Super 12, 1998, 1999, 2000, 2002, 2005, faatasi ai ma le Super 14 i le 2006 ma le 2008. Ae o le solo a se tasi fatusolo, o le polo e laumiumi a popo e fitifiti solo, e lē iloa lava le itu o le a fiti i ai i le faaiuga o le vaiaso.
O le mae‘a ai o le lami a le Waratahs i le Semi Finals ma le ‘au a le Brumbies 26 i le 8 i le faaiuga o le vaiaso, atoa ai ma le mataina o le sikoa saikolosi a le alii o Alofa Alofa, a o le vaaleletau le masau a Israel Folau, lea ua maua ai nei le avanoa o le Waratahs e saili ai sona manumalo i le Super Rugby.
E lei tofo lava si nei ‘au i le suamalie o le manumalo talu ona finauina nei taaloga faavaomalo, peitai, e iai le malosi o le loto o le kapeteni a le Waratahs o Michael Hooper i le taaloga o loma nei, “E ui ina miliona taimi na faoa ai e le Crusaders le manumalo, ae iai le faatuatuaga e tele se avanoa mo le Waratahs, It’s new and exciting territory.”
Malosi foi le finau i le maitau atu i le ‘au a le Waratahs i le Semi Final na se‘i mavae atu, e lei iai se taimi na alutamala ai le puipuiga ma pasiga faapea le faatinoga o le taaloga. Aemaise o le taaalo a alo Samoa o loo iai i le kalapu lanumoana, e lē ma‘i lava tamaiti o le Manu.
O le a lē taumate le finau o le taaloga o le a sauni atu i ai. O le Waratahs o le a talimalo i le Finals ma le Crusaders i le faaiuga o le vaiaso. Manatu foi o se tasi lea o faamalosiau mo le ‘au lanumoana, auā o lea o le a faia atu i ona laufanua le sailiga siamupini.
A o ai lau peti, Israel Folau poo le tatou moa folau? Moni ai loa le tapuaiga a se tasi toeaina, ‘ou te ‘au i le Crusaders ona o lea e tali la‘u penisiona i Niu Sila, ae ou te tapuai ia Israel Folau ona o le Samoa’. Ia talosia taumafaiga a ‘au e lua ma ia manuia tele lau tapuaiga.
