Sauni le Ava o le Feiloaiga mo Tuilaepa ma le HRPP

O le taeao o le Aso Tofi nei e taunuu ai le vaalele o loo afio mai ai le Afioga i le Alii Palemia o Samoa i Sini nei, le Afioga Tuilaepa Dr Lupesoliai Fatialofa Aiono Sailele Malielegaoi mo le faamanatuina o le Aso Fanau lona 33 o le vaega faaupufai o le HRPP i totonu o Sini nei.

O lea aumalaga o le a faatasi mai ai lona faletua ia Gillian Malielegaoi ma sui o le pati e pei o le afioga ia Toleafoa Faafisi, Tolofuaivalelei Leiataua, Lafaitele Patrick Leiataua, Tuisugaletauā Aveau Sofara, Lenatai Victor Tamapua, Mene Sooalo, Gafoa Faitua ma nisi.

E toa sefuluono suafa o Minisita ma faipule o loo tusia i le lisi na faasalalauina i luga o leitio i Sini nei aepeitai o isi sui e toafā o ni sui o komiti a le HRPP e aofia ai Louis Tafunai, Fagaseuo Too Teo, Phillip Wendt, Wendy Williams ma nisi.

Saunoa le Taitaifono o le Fono Faufautua a Tagata Samoa i Sini, Teleiai Sonny Wilson o lenei faigamalaga e taunuu mai ona afea loa lea o le Maota o le EFKS Fairfield e faia ai le ava o le feiloaiga.

O le itula sefulutasi o loo fuafua e faataunuu ai lea faamoemoe ona sosoo ai lea ma se taumafataga mamafa.

O lea lava afiafi o le a feiloai ai aiga ma uo i sui o le au malaga ona tapena ai loa mo le Aso tele, Aso Faraile nei 19 o Oketopa.

O le taeao lea o le a aofaga potopoto ai le aumalaga ma le mamalu o Samoa i Sini nei i le tatalaina o le ofisa o le Konesula i lona nofoaga lea faato‘ā a faailoa mai, o le tulimanu o Scott Street ma George Street i Liverpool.

O le itula e 10:00 i le taeao o le amata ai le sauniga ma o le Afioga i le Alii Palemia o le a nafa foi ma le saunoaga autū o le Aso.

E sosoo ai foi ma le tatalaina o se lala i Sini nei o le faalapotopotoga o le Toomaga mo e Puapuagatia poo le SVSG i lea Aso.

O le taualuga o lenei sauniga i le taeao o le a see atu ai loa mo le taumafataga i le pitonuu o Miller e faia i le Hall a Michael Wenden.

O le itula e tasi i le aoauli o le amatalia ai loa le taumafataga ma le faamanatuina o le 33 tausaga o le HRPP i Sini.

O meaalofa o le a maau i ai itumalo ma aiga e tauala atu lea i seleni auā o le fitu i le taeao o le Aso Toonai e tuua ai e le HRPP Sini mo Perisipeni mo le faaauauina o le Aso Fanau lona 33 o le vaega faaupufai lea ua 33 tausaga o tulai mai i le foe.