Sauni Fomai o Taotoga Faapitoa mo Samoa

Ua sauni atu nei se aumalaga o alii ma tamaitai fomai i taotoga faapitoa mo Samoa e ofo la latou tautua i tausaga taitasi. O loo taitai i lenei aumalaga e se alii fomai (plastic and reconstructive surgeon) e suafa ia Dr Benjamin Norris mai Sini.
O le susuga ia Dr Norris e maupaolo i se tamaitai Samoa le Afioga Seiuli Norma Schwalger mai Togafuafua ma Sapapalii, o se tamaitai fomai pasi o loo galue i le Falemai o St Vincent i Sini. O isi sui o le aumalaga e aofia ai le susuga ia Dr Alan Goodey (anaesthetist) Mary Jane (scrub Nurse) faapea Seiuli Norma ma Dr Benjamin Norris.
O le aso 28 o Setema e taunuu ai lenei aumalaga i Samoa e galulue fua mo le mamalu o le atunuu e lē gafatia le taugata o togafitiga ma nei taotoga i atunuu mamao e pei o Niu Sila ma Ausetalia.
O le Aso Gafua 30 o Setema e feiloai ai le vasega o fomai faapitoa ma le mamalu o le atunuu o loo moomia nei taotoga faatoa amata faagasolo ai lea o galuega togafiti mai le aso muamua o Oketopa agai atu i le aso fā.
Ua faalauiloa e le susuga Dr Benjamin Norris i mātua ma fanau o loo iai ni vaega e fia taoto mo le faaleleia e faafesootai le matagaluega o taotoga i le falemai o Tupua Tamasese Meaole pe fesili foi i le alii Fomai Samoa i taotoga ia Dr Aleki Fuimaono lea latou te galulue pe a taunuu atu i Samoa i le telefoni +685 6682.
O le aso 28 o Setema e amatalia ai taotoga faapitoa mo le mamalu o le atunuu i le falemai tele o Tupua Tamasese Meaole.
O aafiaga e togafitia e aofia ai vaega o foliga ua faaleagaina, ma‘ila mai manu‘aga ma vaega na mu, tuma ma patupatu faapea manu‘aga o lima ma sooga.
E lē aofia ai papala o le tino ma isi aafiaga o le tino aemaise mea na faaleagaina mai taotoga muamua mo le faalaleleiina o foliga (cosmetic conditions).
O lenei malaga e lagolagoina e le AUSAID ma kalapu Rotary a Ausetalia ma Niu Sila mo le tolusefulu tausaga talu mai le 1983.
E tusa ma le limasefulu vasega o fomai faapitoa faapenei e auina atu i le Pasefika i tausaga taitasi e fesoasoani i auaunaga a fomai ma falemai a le Pasefika.