“O le faipule ma ni matai faapea ni taulelea o Satapuala ua molia”…Leoleo
Ua sauni le faipule o Aana Alofi Numera 3 le Afioga Toesulusulu Cedric Schuster, e tulai i le faamasinoga i le aso 9 o le masina fou o Oketopa e tali ai i ona moliaga e tolu ua faia e leoleo ma le Loia sili a le Malo e faasino i le suesuega a leoleo i le mataupu na tulai mai i Satapuala i le masina o Aukuso 2012.
Ua silafia e lo tatou atunuu lea mataupu e pei ona sa pupuni ai e le nuu se vaega o le alatele i se pamaa na ati, ona o se taumafaiga e taofi ai le oo atu o leoleo e puipuia le eleele o le Esetete Tausi i Faleolo o le a fausia ai le falemai faaitumalo e faatupe e le Malo tele o Amerika.
O moliaga o le aii faipule o se matai foi o Satapuala e aofia ai le faamata‘u o leoleo i ni faaupuga na ia lafo e faapea, “faatali outou o le a o mai tamaiti e lau le tou iuga,” le moliaga o le lafo o ni upu masoā i leoleo, ma le moliaga o le auai i se faapotopotoga o tagata e lē faatagaina faaletulafono.
“Ou te tetee uma i moliaga nei, ae ua ou sauni e tuuina atu a‘u mau i le faamasinoga e lagolago ai la‘u tetee”. O le finagalo lea o le faipule ina ua fesiligia mo sona finagalo ina ua mae‘a ona ia tauaaoina se tusi samania mai leoleo ua logo ai i ona moliaga.
E toasefulufitu isi tagata o Satapuala ua molia faatasi ma le faipule e aofia ai ni matai e pei o le afioga Muagututia Leao Akeripa, Vaili Mimita, ma Ga Sakaria, o isi o taulelea ma ni matai foi e lei mafai e le faipule ona ia faailoa mai i lana faamatalaga na te lē o maua uma suafa o ia matai ua molia.
O le taunuu o leoleo i le faia o moliaga o le taunuuga foi lea o suesuega sa feagai ma se vaega faapitoa o leoleo sa silasila i le mataupu.
Faaalia e Toesulusulu o lana silasila i moliaga ua avatu, ua lē mafai e leoleo ona taunuu i se moliaga, sili atu ona matuiā pe a fua i le saunoaga faaminisita a le Palemia i le Palemene na ia faailoa ai le faia o sana faaiuga e ave o ia i leoleo ma le Loia sili e faia ai ni moliaga faasolitulafono.
“O moliaga nei ua aumai o ni moliaga e māmā ma ou te talitonu ua na o ni moliaga e tau ina faatino ai le latou galuega ae ou te iloa e leai ni molimau e lagolago ai”.
E valaau faatasi moliaga o le faipule ma isi matai o Satapuala faapea ma taulelea ua molia.
O tusi samania foi mai leoleo na faailoa ai i le toasefulufitu o isi tagata o le nuu o latou moliaga e aunoa ma le aumaia i le ofisa autū o leoleo e faia ai moliaga ma taofia.
Faaalia e le sooupu o le matagaluega le afioga Leaupepe Fatu Pula, e leai lava se eseesega o moliaga o le faipule ma moliaga o isi, ae o loo iai ma isi moliaga e pei o le umia o ni aupega matautia, ma le faalavelave i tiute o leoleo.
