A oo ina faamanuiaina le tagata i se taleni e tusa ma le finagalo o le Atua, ona maua lea i le loto fiafia ma le agaga faagaeetia ma toe faapea ane ai: “Le Atua e, ia faia lou finagalo e tusa ma lo‘u valaauina, ma ia ou iloa ona toe faafoi atu ai pea lou viiga e faavavau lava”.
O le lagona maualuga lea ua faatumuina ma faafiafiaina ai le tamaitai pese, 23 tausaga o Christina Fatu mai Magele i Aukilani nei, ona o se faamanuiaga ua oo i ai lona soifuaga sailiili ma le tauivi ia laasia se laasaga e faamanuiaina ai.
O le po o le Aso Tofi na mavae atu nei na faatumulia ai le Samani Pulepule Hall i Magele, i le toatele o le tupulaga ma matua na latou molimauina se koniseti mo le lagolagoina o le taumafaiga sa feagai ai ma le tamaitai o Christina Fatu, e saili ai se seleni e fesoasoani ai i ana fuafuaga mo le faasauni atu i lana aoga i le Kolisi o Musika i Berklee, i le aai o Boston i le atunuu tele i Amerika.
O le tamaitai o Christina, ua nao ia lava mai Niu Sila, ua faamanuiaina ma taliaina i totonu o lenei kolisi i lenei tausaga e saili atu lea mo le faailoga o le tikeri i mea tau musika, amataina i le masina o Setema. O le mafuaaga o le sailiga seleni mo le faamoemoe, ona e tusa ma le $85,000 tala Niu Sila le pili o lana aoga, i le tausaga e tasi.
Sa soifua mai i totonu o lona aiga e faavae i le finagalo alofa o le Atua ma lona talitonuga faatasi ai ma lona faamoemoe maualuga mai lona tuputupu ae, e faataua ma faaolaola le taleni o le musika e ave ai le viiga i le Atua. O lona soifuaga atoa sa siosiomia i le musika patino lava i totonu o le siosiomaga faaleAgaga i totonu o le Lotu.
Na taua e Christina lona faagaeetia ma lona agaga faafetai tele i le Atua ona o lenei faamanuiaga ua ia maua. Na faapea sana saunoaga, o le tele o taimi o lona olaga na te vaaia ai e pei o se faata lona iloa atu o lona lumanai ma lona faamoemoe ina ia avea le musika e fai ma auala e oo atu ai lana auaunaga e faailoa atu ai i tupulaga le finagalo alofa o le Atua. Na te lei mafaufauina foi o se tulaga lea o le a oo i ai lona taumafai ma ana sailiiliga e faalautele ai ona moomooga.
Ua sauni atu nei le tamaitai o Christina mo lana malaga i Samoa sei asi nai ona aiga ma faasoa atu foi lenei faamanuiaga ua na maua, aemaise foi le faamanuia mai a si ona aiga e tusa ma lona faamoemoe, ona foi mai loa lea ma sauni atu i Amerika i le masina o Setema.
O le faamoemoe maualuga o Christina a oo ina faaiuina ma faamanuiaina lona taumafai, e fia avea o ia ma avefeau a le Atua e ala i le taleni musika o le a faalauteleina ai lona iloa ma lona malamalama, e mafai ona ia faasoa atu ai i tupulaga o a taeao aemaise lava i tupulaga a le Pasefika ma tamaitai Samoa e tusa ma le finagalo alofa o le Atua.
O Christina e talenia tele i le taina o le piano, kitara ma isi mea fai musika aemaise foi i le faaaogaina o lona siufofoga e pese ai viiga o le Atua e pei ona sa faalauiloa i lea po i le koniseti. Sina faamatalaga puupuu i lana soifuaga tautua pese, na avea o ia ma se tasi sa auai i nisi o aufaipese toatele, e pei o le Auckland Pacific Gospel Choir, Masque Vocal Ensemble, The Graduate Choir. Sa auai foi o ia i le APGC recording, Christmas in the Park, Parachute Music Festival, NZ Music Awards, TVNZ Comedy Christmas Gala, Lakeside Concert Rotorua 2008, ma nisi o anoano o avanoa na ia auai ai, ma faaaogaina ai i lana taleni.
