E sui faiga, e sui le aogā o mea i le vaai ma manatu, e sui ala o le faagaoioiga o le soifuaga, e sui talitonuga ae lē mafai ona suia lau aganuu na e soifua mai ma oe, o le ta gagana Samoa o le ta tofi lea mai le Atua, o le matafaioi e lē tatau ona tuuvaleina ae ao ona tapue ma faaola ia aua nei mou atu.
Ua toe nei o se aga ona oo atu lea i le aso tuupoina o le Sootaga a mafutaga eseese a alii ma tamaitai Samoa o loo a‘otauina i totonu o Iunivesite a Niu Sila, lea o le a talimalo ai Canterbury i totonu o laufanua lafulemu o Kalaiesetete mai le aso 2 Iulai – 6 Iulai 2010.
O le sefulu ai nei o tausaga talu ona toe foi mai i Canterbury le tauaofiaga lenei e pei ona masani ai ona tuufaasolo i isi Iunivesite, na faaalia mai e le tamaitai o Ashalyna Noa Siaosi (Public Relations Officer) lea o loo feagai ma fesootaiga vavalalata i totonu o le latou mafutaga.
E 6 iunivesite o le a auai, e aofia ai Aukilani, AUT, Ueligitone, Waikato, Otago ma Canterbury ma e tusa ma le 300 le aofai o fanau aoga ua faama‘oti mai le fuainumera.
I se faatalanoaga i luga o le leitio i le polokalame a le siufofoga o le “Penina o Samoa” Plains FM 96.9 Canterbury, ma le alii Peresitene o le mafutaga a alo fanau Samoa i Canterbury, Sam Latu na ia ta‘ua ai ua matuā lava sauni ma lava tapena le latou mafutaga i le faatalitali atu i le malaga mai o nai o latou uso ma tuafāfine e ala i le latou Sootaga faaleaoaoga.
O le autū (theme) o le Sootaga mo lenei tausaga o le “Ai ulu tuanai Taisi” ma o le a taulai i ai mafaufauga i felafolafoaiga, faafiafiaga aemaise a latou pesega ma faaevagelia.
Na faaalia mai e le tamaitai o Ashalyna, o le polokalame o le aso, o le a muamua i se latou lotu faafetai ina ua taunuu manuia, sosoo ai ma le ‘ava o le feiloaiga i le CPIT i le taeao o le Aso Toonai.
O loo aofia ai i totonu o le latou polokalame taaloga, o faaevagelia (Christian Rally) e faia lea i le St Pauls Trinity Church, o loo i lalo o le ta‘ita‘ina a le susuga i le faafeagaiga Lapana Faletolu.
O le latou lotu tuufaatasi o le Aso Sa e tauaofia i le Iunivesite, ma e saunia lelei mai le pese lotu a le a‘oga, faatasi ai ma le taualuga o le Sootaga, o faafiafiaga faaleaganuu i le po o le Aso Gafua.
Ua faatulagaina le lautogia o faafiafiaga e ala i le mauluulu, faataupati, pese aulelei atoa ai ma le aumaia i totonu o le ausiva faapea le toe mou faatamalii atu i fafo ina ua mae‘a si a latou faafiafiaga.
O le taimi nei o loo umia e le Iunivesite a Aukilani le ipu o le manumalo aoao i le tuufaatasia o togi. Ae peitai ua faailoa mai e le peresetene a Canterbury, Sam Latu i le tusitala, ua uma ona iloilo lelei tupe toa, masalo o le a faasima le ipu i totonu o le aai o fugalaau matala.
Ua nofo tapena le to‘a fitusefulu o tama ma teine aoga a Canterbury e faatalofa ma faafeiloai atu i lo outou afifio mai. Tau ia ina ia alofagia e le Atua fuafuaga o le a alo atu i ai fanau a le atunuu mo le masina fou.
O se latou sao e avea ma faasinoala i tupulaga lalovaoa, ia avea foi o se meaalofa sili ona tāua, e a le tu e a le tu lava. Ia manuia le alo atu i le mafutaga ma ia manatua, ‘aua nei ai ulu tuanai taisi’.
