Sauni Alex Leapai e lu‘i le Siamupini o le lalolagi i le paga mamafa!

Ua mae‘a nei ona saini le konekarate a Alex Leapai, ma e tusia lenei ripoti o lea ua malaga atu i Siamani e fesagai ma le alii tautaua i le fusu poo le siamupini o le lalolagi le alii o Wladimir Klitschko.
E tusa ma le 6 miliona tala se tinoitupe o le a maua e Alex Leapai pe afai e tau lau o lona faamoemoe ma le manuia, ae tusa ma le 1.5 miliona tala e maua mo le auai i le fusuaga.
O le paga a Alex ua atoa le sefulu tausaga e lei malolo lava ma o loo ia umia fusi o le paga mamafa i le WBO, WBA, IBF & IBO o fusi nei o loo tulimatai i ai le silasila a le tama o le Tuisamau.
Mai le 64 o taaloga a Klitschko, e 61 na manumalo ai ae faiaina i taaloga e 3. Na saunoa manino lava Alex ma lona lē fefe e faapea, “I totonu o lo‘u fatu ou te talitonu ou te manumalo ai, ia e sauni mai Klitschko.”
Pei ona silafia o Alex Leapai o se alo o Samoa ua avea nei ma siamupini o Ausetalia i le paga mamafa a le WBO. O le vaiaso ua tuanai na matuai faafiafaiaina ai aiga ma uo a Alex i se tufaga award a le autaaalo i le itumalo o Logan City.
O se tala fiafia na faateia ai ina ua tolaulauina e lē gata na maua e ia le top award ae na ia mauaina ai foi le award o le sportsperson & sportsman o le tausaga.
O lea tufaga faailoga na guest speaker ai le tama taalo a le NRL le alii o Darren Lockyer ma nisi o tagata taaalo taualoa ae filifilia mai ai le Samoa i le tumutumu mauga le susuga ia Alex Leapai. Ua faamoemoe e toe taliu mai Alex mai Siamani ona tuuvaa atu lea mo Niu Sila i se valaaulia faapitoa e avea o se malo faaaloalogia i le Super 9 a le NRL. O le Aso Toona, 15 o Fepuari o le a tuuvaa atu ai loa i Samoa e feiloai ma le Palemia ma le Malo o Samoa auā se faamanuiaga a o lei faia le fusuaga faitaulia i le aso 26 o Aperila.
O le malaga atu o Alex i Samoa auā se faamanuia mai le Malo o Samoa, masalo o le  toatolu ai lea o tamafusu ua faia lea tulaga e pei ona amataina mai ia Rocky Maivia, Toaletai  David Tua, ma o lea foi ua sauni atu i ai Alex e pei ona malaga atu ai nisi o ona aiga ma lana team i le Aso Toonai a o tālia mai le malo o Samoa.
E moomia lava e Alex lau tapuaiga Samoa auā le faamoemoe ua alo atu i ai i le aso 26 o Aperila i le lu‘iina lea o fusi uma o loo umia e le siamupini o le lalolagi i le heavyweight  Wladimir Klitschko i fusi nei o le WBO, WBA, IBF & IBO.
O ou māmā lava na Alex! Ia faafualoa pea le osoosoga o lou malosi a o e sauni atu e tau le taua. O oe lava o le toa e te mafaia mea uma lava i le faamalosi atu o Keriso!