Sauni Aggie Grey Hotel toe tatala faitotoa ia Iulai 2014

Ua telē se suiga ua iai nei galuega mo le toe faaleleia ma le toe fausia o le tele o vaega o le faletalimalo o Aggie Grey i Vaisigano.
O le kamupani mo galuega tetele faapea, le Qing Dao Construction o loo faatinoina lenei galuega tele, ma ua lipotia mai e tusa ma le $35 miliona le tupe o loo faaalu mo le galuega, lea o le a toe siitia ai le tulaga lelei o le fale.
E fogafale fā lea ua fausia nei i le vaega tonu sa iai le faleoloa mo le faatauina atu o meaalofa. Ae o lea la ua fausia ai nei le fogafale fā lea o loo iai ni potu mananaia e 50 ma se potu mo fonotaga.
E pei ona silafia na matuā faaleagaina uma le tele o lenei faletalimalo i le afā o Eveni, aemaise lava ina ua pa le vaitafe o le Vaisigano.
Na faaleagaina uma faleaiga, o bars, ma fale faasamoa (bungalows) sa iai i le vaega pito i lalo o le vaega, ma o vaega uma ia o loo toe fausia nei. E oo foi i le fale fogafale tolu lea sa pito i luma faatasi ai ma le vaega autū i luma o loo muai faatō‘ai atu i ai malo ua toe
faafou uma.
E iai le faamoemoe o le pulega ina ia toe tatala le faletalimalo mo pisinisi masani, a o lei amataina le fonotaga a atunuu laiti o Malo Aufaatasi (United Nations SIDS), lea o loo fuafua e usuia atu i Samoa i le masina o Aukuso o le tausaga fou, 2014.