Satia e taifau le pepe tama lē atoa lona tino

O le afiafi o le Aso Sa 29 o Setema 2013 poo le tea o le ono ua lata i le fitu ae vaaia e le alii talavou o Atapana Siitia o Vaitele-fou se mea o loo ‘ai mai e le taifau a lo latou aiga i luma o le latou fale.
Na savali atu i ai se‘i autilo poo le ā le mea, ae na faateia ina ua latalata atu i ai, o se mea e foliga o se pepe faatoa fanau. O lana faamatalaga o ia ua matuā meia lava ma te‘i ona e vaai atu ua leai ni lima o le pepe.
Na logo vave loa leoleo e lo latou aiga ma agai atu loa Malu o le Malo mo le aveesea mai o le pepe ma amata faia suesuega poo fea tonu na iai le alualutoto ma lafoai ai ina ua fanau lona tina.
O le tala  a le alii o Atapana o le pepe na toso atu e le latou taifau i lo latou fanua lea e siomia e se pa ma fai le faitotoa e uamea e loka ma tatala. O suesuega a leoleo i le vaiaso na tea nei e oo mai i lenei vaiaso fou e lei maua ai lava poo ai le tamaitai e ana le pepe.
O se fautuaga lea a leoleo i le atunuu aemaise aiga e nonofo latalata i le nofoga na maua ai le pepe mo ni faamatalaga e fesoasoani i suesuega ma sailiga a leoleo o loo faia.
E faamomoi loto lenei faalavelave ona ua tatou iloa ma silafia e lē o se taimi muamua ua aliali mai ai.
O le agaga foi lea o le faalapopotoga o le Toomga mo ē Puapuagatia e pei ona saunoa le pelesetene le faletua o Lina Chang, o loo maua i le faalapotopotoga le fesoasoani mo tamaitai o le tatou atunuu e aafia i ni ma‘itaga ae tulai mai ai ni lagona lē mautonu i lona ma‘itaga a o lei fanau le tagata fou.
“O le Toomaga o lou aiga, ma lau uo e te sulu mai i ai mo se fesoasoani matou te alolofa ia te oe”, o le finagalo lea o le pelesetene ina ua faataalise mai se pepa o faamatalaga i le tuanai o le faalavelave.
O le lafoai o se pepe o se solitulafono matuia ma e faasalaina i le falepuipui se tasi na te soli ma faamaonia lea solitulafono. O nisi pepe e lafoai e maua lava o loo feola ae o nisi e maua ua uma le ola e pei o le pepe tama na maua i Vaitele-fou.
O loo iai nisi o auaunaga o loo ofo e faalapotopotoga tuma‘oti e pei o le Mapusaga o Aiga, aemaise o le vaega o le soifua maloloina lautele mo tina ma tamaitai e fia maua se fesoasoani i ni ma‘itaga lē manaomia ua aafia ai. O le naunautaiga o ia auaunga ina ia faasaoina le ola o le pepe mai nisi tulaga e oo i ai.