O se tasi lenei o faafitauli o loo saoasaoa foi lona tulai mai, ma o loo taufetuli faatasi lava ma le lima tagoese faapea le fasi tagata poo le faaoolima ona o le manao i tupe. Leitioa fai mai le Tusi Paia, “Aua o le manao i tupe o le pogai lea o mea leaga uma lava.”
Ua na o le mau faafitauli, e pei foi ona tulai mai ni faalavelave o loo aafia ai foi nisi o tupulaga Samoa i le aai o Niu Sa Uelese. Ua lē asa se vaiaso ma tutupu nei faalavelave, ma o loo tele ina lapataia ai pea le mamalu o le atunuu ma soo se tasi e nofouta ma mataala i ai aemaise lava le lokaina lelei o faitotoa o fale pe a tuua na o nai mātua matutua ma tamaiti.
O le isi fautuaga o le mataala pe a tulioso i fafo ma taavale auā e leiloa se vaipanoa o mata‘i ma taulai atu ai le fili poo le ‘aulētaupulea.
Na faateia le Teu oloa o le mafutaga a le Logan Samoa Advisory Council Inc (Lesa Chanwai) ina ua maua mai se valaau i le Aso Gafua, aso 14 o Mati mai le City Council ma le ofisa o leoleo e faapea, e tatau ona faatopetope atu i le latou ofisa ona ua iai nisi o vaega ua faaleagaina talu mai le osofaiga i le faaiuga o le vaiaso.
E tulai mai lenei faalavelave o loo malaga le Peresitene, Faimalo Faleiva Tau, ae o loo faatasi atu le sui Peresitene ia Veletaloola ma le faletua ia Penina Kaleopa i le faamasinoga o alo ma fanau Samoa o faagasolo nei.
Na ta‘ua e se sui o le LSACI sa avea muamua ma failautusi o le Asosi (Site Ah See) e tusa ai ma se talanoaga ma le faletua ia Lesa Chanwai, e tele mea ua faaleagaina o le latou ofisa, e pei o le aveesea o fagu fuimu (Fire Extinguishers) ma o fagu nei na faaaogāina e fana atoa ai le fale.
O le auala lea ua matuā to‘a ai pauta i totonu o le fale ma e lē mafaia e se vacuum ona mimitiina.
O loo tālia le toe taliu mai i fanua o le Peresitene mo le faafesootaia lea o se au kilini faapitoa latou te faamamāina le fale atoa ma aveese pauta ua mafiafia i potu ma ofisa.
Ua taei uma faamalama i tua atoa ai ma computers ua matuā faaleagaina faapea ma nisi o pepa aogā mo galuega fai a le Asosi ua savavali solo ma ua leiloloa.
Ua mae‘a nei ona siakiina tulaga a lima e le matagaluega o leoleo, ma ua galulue loa i le taimi nei e sailia le au ula leaga ma le lē taupulea na faia nei uiga lē alofa. E leai a se mea lilo e lē faaalia. Talosia ia maua ane o nisi e ese mai, ae leaga le maua ane foi o ni tama a le eleele.
O loo mataalia pea mafutaga uma a Samoa i Brisbane e puipui le igoa o Samoa mai faafitauli e tulai mai, aemaise o le galulue lea i auala e fautuaina ai le tupulaga ina ia aloese mai nei ituaiga amioga.
