Ose tasi lenei o solitulafono ua sasao faaafi ile atunuu talu mai le faaiuga ole tausaga na tea nei e oo mai lava ile amataga o lenei tausaga, toatele nisi o aiga na molimau mai ile osofaia lea o latou maota ma laoa ae ave nisi o meatotino taugata. Ose tasi o aiga ile afioaga o Vaivase Uta na ta’ua ai ele tamā e faapea, a’o momoe ma lona aiga ile po ae faalogo mai o pa’ō atu se tasi o faamalama ole latou fale.
Na agai ane ma faaola le moli ma molimauina ai le screen wire ua masae uma ma faaleagaina ise agaese.
Ole isi aiga i Vaitele na osofaia lava ele gaoi lo latou aiga a’o faagasolo ai tiute masani ile mugala ole aoauli. Ole faaiuga ole vaiaso na tea nei na molimauina ai foi e se isi aiga i Nuu-Fou, le osofaia ai e se gaoi.
Ole tamā ia Louis ma lona faletua ia Taunese Lene na toesea mai ile la fale ile po ole Aso Faraile na tea nei, 19 o Ianuari ona sa auai atu ile maliu ose tasi o aiga o Louis, peitai na faateia lenei aiga ina ua taunuu atu i lo latou fale ua faaleagaina uma le pa na siomia ai le fanua, aveese faamalama ma faaleagaina uma le tele o vaega i totonu ole fale, faatasi ai ma le toesea o nisi o meatotino e pei ole Head Stereo, Laptop HP, Drill, Bluetooth Earphone, o tautaliga, asoa ma le anoanoai o teuga mo tamaitai, e oo i ipu ma apa fafano na alu uma i lea osofaiga. Ta’ua ele tina ia Taunese, ose aso pito sili ona faatiga ulu i lo latou aiga ina ua vaaia lo latou fale ile aso na sosoo ai.
Ose tasi o faanoanoaga o Taunese ma Louis, e lē gata ina aveese le tele o meatotino aogā ale aiga ae faaleaga foi ma nisi o meatotino e pei o ato lavalava lea e pū pū uma ina ua tatui ise agaese.
O Louis ma Taunese ma lo la alo e toatasi e lei leva ona toe taliu mai i Niu Sila talu ai nei, na malaga atu e faatamoe o latou pepa sitiseni ina ua manumalo ai ile se’i ole Quota talu ai nei, ma ua toe foi mai ina ua maua ai o latou pepa sitiseni. Saunoa le tina ia Taunese, ole tele o meatotino ua aveesea na aumai i Niu Sila.
Ua faaaogā ai e lea aiga upega tafailagi e pei ole facebook e tau sailia ai se fesoasoani mo le sailiga o nei meatotino.
Saunoa le Sooupu ole Matagaluega o Leoleo le susuga ia Auapaau Logoitino Filipo, e fai lava si tele o aiga na aafia ile amataga ole tausaga lenei ile mataupu lenei ole gaoi ma le talepe fale. E oo mai ile aso 22 o Ianuari na tusia ai lenei ripoti ua atoa ai foi le 22 o aiga na osofaia ele augaoi ma le autalepe fale. Ta’ua e Auapaau, o nisi o mataupu na faagasolo iai suesuega ale Matagaluega o Leoleo ma maua ai i latou na faatinoina nei osofaiga, faatasi ai ma le toe maua mai o meatotino, ae o nisi foi o aiga e lei mafai ona toe maua mai meatotino ona e maua ane e leoleo le augaoi ua leai ni mea totino ua uma ona faaaogā seleni poo le toe faatau ese o meatotino.
Fai mai Auapaau, e molia foi ele tulafono i latou e faatauina ma taliaina meatotino nei.
Ae ile mataupu ile maota o Louis ma Taunese i Nuu-Fou oloo faagasolo iai suesuega ale Matagaluega ile taimi nei mo le sailia o i latou na faatinoina lenei osofaiga, faatasi ai ma le tau sailia o meatotino ona e fai si taugata tele pe a faatupe vaega uma ua toesea.
Ole tele lava o osofaiga nei oloo tulai mai ile vaega o Faleata.
Ua fautua mai ai foi ma le Matagaluega o Leoleo ile atunuu ina ia mataala ile vaaiga lea o meatotino ina ia malupuipuia ma ia vave ona logo le Matagaluega o Leoleo i nisi faamatalaga e uiga i nei tagata solitulafono e fesoasoani ai ile galuega ale Matagaluega.
