Sasaa pea alofa tulai o Iapani e faatupe aoaoga

E lē o muta le agalelei mai o le atunuu o Iapani o se paaga totino a le Malo Samoa e faatupe le fausia ma le faaleleia o faleaoga i lo tatou atunuu.
O fesoasoani e lē o muta ua mautinoa ai le augofie pea o taitai o lea Malo e sasaa mai le sosia o lona tamaoaiga e fesoasoani ai i le atina‘e o le tatou atunuu.
O le ekalesia EFKS ua iai lana galuega o loo fuafua o se aoga o matata eseese e faatuina i Salelologa poo se vocational school.
O se atina‘e tāua mo le lumanai manuia o alo ma fanau o le atunuu auā e lē faapitoa na o tupulaga o lea ekalesia e pei ona saunoa le Failautusi aoao o le ekalesia, le susuga i le faafeagaiga o Dr Iutisone Salevao ina ua ia talia le foai a Iapani o se siaki tupe e $103, 000 tala Samoa e fausia ai lea aoga.
E lē tau fesiligia le tāua o lea atinae ma o se sao maualuga lea o Iapani i le ekalesia e manuia ai ma tagata uma o le atunuu.
O le afioaga o Fasitoo-tai ua matuā faaletonu lava le faleaoga tulagalua ma ua lē saogalemu e toe faaaogā mo le fanau.
Na a‘e aoga i le vaiaso ua mavae e lei a‘e ai ma fanau o loo aoaoina i le aoga ona o faaletonu i le faleaoga, lea la ua aapa atu foi i ai lima agaalofa o Iapani ma tauaao i ai le siaki tupe e $281,500 tala Samoa e fau ai se faleaoga fou.
Peitai o loo va le fogavaa i le pule mamalu a alii ma faipule o Fasitoo-tai ma e faapea o se isi lea mafuaaga o le a faaono tuai ai ona faatino le galuega o le faleaoga.
Ua maua foi ni molimau e faapea ua fuafua se isi itu o le nuu e ave le faleaoga fou e fausia i se isi nofoaga lava o le afioaga ae lē toe fausia i le nofoaga o iai nei.
O se mataupu lenei o loo taumafai ai le Matagaluega o aoga a le Malo e soalaupule ina ia vave faatino le galuega, peitai e lē o iloa poo afea e a‘e ai fanau a o fea foi se nofoaga e faia ai a latou aoga a o faatali le galuega o le faleaoga fou i le fesoasoani mai le Malo o Iapani.
O faamaumauga mai le ofisa o lea Malo ua faailoa ai e 140 atina‘e ua fesoasoani i ai lana polokalame o atina‘e laiti o le Grassroots Human Resources.
E fulisia lava nei fesoasoani i faleaoga mo nuu ma afioaga o le atunuu sa talosagaina ni fesoasoani i lalo o lea polokalame talu ona faalauiloa lea vaega o ana fesoasoani i le tausaga e 1991.
Ua faigofie ona faatino talosaga mo fesoasoani a le Malo talu ona faatuina le Ofisa Amepasa o Iapani i Samoa i le tausaga ua mavae, ua vave ai ona faagaioi talosaga ma maua mai faaiuga i le talia ma le teena.
Lipoti mulimuli: O se lipoti fou o le mataupu i le aoga tulagalua a le afioaga o Fasitoo-tai, ua ta‘ua mai ai le toe tatala i le Aso Gafua, 2 Fepuari o le aoga e pei ona sa taofia ai e le isi vaega o le nuu, ma ua toe faaauau ai nei aoga a le fanau, e ui o loo faagasolo pea feutagaiga ina ia toe iai se leleiga ma toe faaleleia ai le faleaoga e pei ona afaina mai nisi o mala faalenatura na aafia ai le atunuu.