Sasaa mai le alofa o Siamani ia Samoa

O se mataaga o ona po nei ua patino ana faaaliga i tulaga o iai suiga o le tau i le lalolagi na faatautaia i le faaiuga o le vaiaso sana faaaliga tele o ata o le galulolo i Samoa atoa ai ata o Aleipata aua le sailiga o seleni mo tagata ua mafatia i Samoa ona o le galulolo.
O se taumafaiga lenei ua faia e i latou e pulea le nofoaga lenei i le aai o Bremahaven i Siamani.
O lea nofoaga ua iai lona tulimanu faapitoa lava mo Samoa talu ai o le afioaga o Satitoa i Aleipata, o le tasi lea o nofoaga e ono o le lalolagi ua matauina e saienitisi o le fale lenei ua faaigoaina o le Klimahaus (Climate House) le tulaga e iai le tau i aso taitasi.
O isi atunuu ua aofia ai se aai i Alaska ma se vaega o Aferika.
Ina ua tulai mai le galulolo na mafai ona maua mai e i latou i lea nofoaga aafiaga na oo i ai Aleipata i le taimi o le tsunami.
Ua atoa foi le lua o masina talu ona foi mai Foua Toloa o lē o loo galue i le Ofisa o le Siosiomaga o le Pasefika (SPREP) ma o le ulu foi o Tokelau i se faigamalaga i lea nofoaga ma na mafai ai ona fausia se fale Samoa i le nofoaga lenei.
O ni ata na mafai ona lafo atu i Samoa nei e le WT Media ia ua faalapopoa e le Klimahaus atoa ai ma ata na tapue atu i le amataga o le polokalame lenei ma Satitoa ia na faaaoga uma i le faaaliga tele lenei i Siamani.
O le tupe na totogi e i latou na ulufale atu aua le maimoaina o ata ma faalogologo i se lipoti e faatatau i vaaiga o le satellite i le aso o le tsunami na aoina uma ma o le vaiaso nei e lafo faatasi ma ai i Samoa aua le fesoasoani ai i le Malo i galuega e moomia le toe faaleleia.
E tolu foi le aofai o nisi teugatupe mo le tsunami mo Samoa lava ia na amata tatala i le aso na tulai mai ai lea faalavelave matautia i le atunuu ma o nei teugatupe o le tasi e mai i fanau a Samoa o loo nonofo i Siamani, o le isi e mo tagata lautele lava o lea atunuu ma le lona tolu o le teugatupe na tatala e le faalapotopotoga o le Greenpeace a Siamani.
O le vaiaso nei foi lea ua fuafua e aumai ai le tupe ua aoina i nei teugatupe ma tauaao atu i le Malo aua lava lenei faamoemoe.
O Siamani lava ia i lona faigamalo na faapea foi ona avatu lana fesoasoani e $100,000 (Euros) tusa lea ma le afa miliona tala Samoa aua galuega toe faaleleia a le Malo.
O loo foai foi lea lava malo ma isi tuaoi i Europa e ala i le Komisi o Europa poo le Iuni a Europa lea ua faalauiloa lana foi fesoasoani mo galuega fia faatino i Samoa aua le toe faafoi ai o le atunuu ma ona vaega ua aafia, i le tulaga sa iai a o lei afaina i le mafuie ma le tsunami.