O le lulu (raffle) saili tupe a le kamupani lafo tupe faamomoli o le Pacific Ezy Money ua maua ai se tupe e $45,000, ona faaalu lea o le $10,000 i faailoga ae vaevae le $35,000 i faalapotopotoga tumaoti ma le ekalesia EFKS i Magele i Aukilani ma le Ituaiga o le Faatuatua o le Ekalesia Katoliko.
O le faalapotopotoga tumaoti o le Toomaga mo Tagata Puapuagatia (Samoa Victim Support Group) e pito mamafa i ai le faasoa o le foai faasamaria agalelei a le kamupani, e $15,000.
O le Ituaiga o le Misionare o le Faatuatua a le Ekalesia Katoliko e $10,000, ae ta‘i $5,000 mo le nofoaga o Tamaitai Sa Monike i Vailima ma le Ekalesia EFKS i Magele mo le latou polokalame o le 13 aso o pesepesega o le Kerisimasi.
E lē o se taimi muamua lenei ua faia ai ni foai faasamaria agalelei a lea kamupani lafo tupe faamomoli.
O se tasi o ana foai tele na faia i le tausaga e 2009 o le siakitupe e $40,000 mo le nofoaga o tamaitai Sa Monike i Vailima i le fia fesoasoani o le kamupani i le faatuina o se nofoaga mo lea ituaiga o Tamaitai Sa i le atunuu o Tonga.
Sa fesoasoani foi le kamupani i le Nofoaga o tagata matutua i Mapuifagalele faapea se tasi o alo o Samoa lauiloa i taaloga taufetuli afeleti, le susuga Aunese Cureen.
O le faalapotopotoga foi i Niu Sila o le Heart Mission sa foai iai e le Pacific Ezy se siakitupe i tausaga e lei mamao atu. Faaalia e le alii pule o Faimalo Allan Stowers, o le autu o foai ua faia o le toe faafoi atu lea i le atunuu o loo lagolagoina le tautua a lana kamupani o le faafetai e ala i seleni e fesoasoani ai i faalapotopotoga o loo galulue mo isi tagata.
Fesoasoani i le Manu Samoa
O tapenaga a le au lakapi a Samoa i le Ipu o le lalolagi ua liliu foi le tofa Faimalo Allan ma lana kamupani e fesoasoani i ai.
O le po na se‘i ai le lulu a le kamupani i le faletalimalo o le Moanalisa i Vaitele-tai, na auai le toatele o malo valaaulia aemaise i le Sui Palemia o Minisita o le Kapeneta ma nisi o faipule o le Palemene.
O le po lea na faailoa ai e le alii pule le fesoasoani a lana pisinisi lafo tupe faamomoli, i lona faaluaina o foai tupe o le a lafoina i lea po i siva Samoa.
O le sausaunoaga a le Sui Palemia na tatala i le $500 ae mae‘a ane e maua le $800 tala. O le ofo a le Pacific Ezy Money ua faaopoopo i ai le isi valuselau tala maua ai le $1,600.
O le isi siva Samoa a le vaega e ta‘ua o le My Friends o tamaitai sa a‘oa‘oina i le Kolisi o Sagata Maria na maua ai le $300, ma na faaluaina foi lea tupe e le kamupani ma maua ai le ono selau.
O loo silasila nei le alii pule i se isi auala e maua ai ni seleni mo le Manu Samoa, ma o tupe uma foi o le a maua ai o le a faaluaina le aofaiga e lana kamupani.
Faaalia e Faimalo ua matuā talia ma le fiafia e le Pule Sili o le Iuni Lakapi a Samoa le susuga Su‘a Peter Schuster le lagolago atu a lana kamupani lafo tupe faamomoli.
E pei ona silafia e $4.5 miliona se vaegatupe o loo fia maua mo tapenaga a le Manu Samoa.
E iai isi sailigatupe o loo tapena i ai le iuni lakapi a le atunuu, e pei ona filifilia se Komiti i Niu Sila latou te faatinoina sailiga seleni mo lea faamoemoe.
