Ioane 8:31-36 (Fuaiupu 32 “E iloa foi e outou le mea moni, e tuu saoloto foi outou e le upu moni.”)
Ae o le ā le Upu Moni oloo fetalai i ai Iesu? A faamalamalama le Upu Moni, e tatau na vailiili ma suesue le aano o le manatu o le tusitala, ma iloa le mafaufau o le tagata sa saunoa i nei upu, ae lē o le taumafai o tatou e faamatala pe fau i ai ni o tatou manatu, auā e sese ai.
Manatua, oloo amata le fetalaiga a Iesu (f.31), ‘Afai tou te tumau pea i la‘u mataupu, o o‘u soo moni outou.’ O lona uiga, o le Upu Moni, o mataupu, o aoaoga ma le talalelei a Keriso e ao ona tatou tutumau ai. E le o le upu moni ni talitonuga o isi tagata, poo ni faavae a se faalapotopotoga.
E le o le upu moni ni tulafono a se ekalesia poo tala o le vavau. O le Upu Moni, ia TUMAU i aoaoga ma mataupu a Keriso. E faamaonia lea e le fuaiupu e 36 ‘O lenei, pe a tuu saoloto outou e le Atalii, ona saoloto faamaoni ai lea o outou’.
E te le maua le saolotoga i lou iloa o le Atua, auā e iloa foi e tagata le lolotu le Atua. E oo ia Satani na te iloa le Atua. Ae maua le saolotoga i le TUMAU ma usiusitai i le finagalo o Iesu.
I le Ieremia 7:8-10 ‘Faauta, ua outou faatuatua i upu pepelo, e lē aoga. Tou te gaoi ea, ma fasioti tagata, ma mulilua, ma tauto pepelo, ma faamū mea manogi ia Paala, ma mulimuli atu i atua ese ua outou lē iloa, ma outou o mai, ma tutū i o‘u luma i lenei fale, oloo ta‘u ai lo‘u igoa, ma outou fai mai, Ua laveaina i matou…’
Silasila i amioga a Isaraelu, lea ua aoai e le Atua. E fai le agasala ma tuinanauga, ae o mai alalaga i sauniga, ua laveaina matou. Se isi faaupuga, ua faasaoloto matou, ua faaolaina matou. Faamata e le o le mea lea oloo faia foi e tatou?
Ua tali le motu o tagata, o matou o fanau a Aperaamo (f.33). Lea e tau tala‘i atu lo latou tupuaga, ae tali Iesu, a ua outou fia fasioti ia te au, auā ua le iai la‘u upu i totonu ia te outou.
O lona uiga, poo fanau a Aperaamo, e lē maua lava le saolotoga moni, aua e lē talia lana aoaoga. Lea foi sa faaseseina ai tagata i le taimi o Ieremia, e oo mai foi i le taimi o Iesu, oloo tumau pea ona taulagi o tagata saoloto. Ae talofa e leai, oloo pologa i le agasala.
Sa toe tali ane tagata, e lei fai lava latou ma pologa o se tasi. O uiga faafiaamiotonu ma le musu e talia le Upu Moni. E faapefea ona fai ane e lei pologa lava i se isi? Ua galo sa faapologa o latou augatamā i Aikupito i tausaga e tele? Ua galo sa ave faatagata-o-taua e Suria? I tala faasolopito o Isaraelu, sa faapologa e Peresia ma Asuria.
Sa faapologa e Nepukanesa ma taase i Papelonia. E oo mai foi i le taimi o Iesu, o loo nonofo saisaitia i pulega a Roma. A o lea e fai ane, e lei nofo pologa lava i se isi. Ua punitia mata e le faamaualuga, ma pogisa o latou agaga i mataupu pepelo ona o le faasausili.
Samoa e, o le agaga foi lea oloo maua ai tatou e oo mai i le taimi nei. Tatou te o i lotu, tali le faamanatuga paia, pepese ma faataunuu tofiga e masani ai, ae talofa, oloo faapologaina tatou e le agasala.
O le upu a Iesu, o lē fai le agasala, o le pologa lea o le agasala. Ua fai falesa ma fale fusu, nisi taimi ua pei o fale faamasino, ma avea le suafa o Iesu ma mea ula, ae taulagi, o tatou o tagata kerisiano saoloto.
E faigata tele ona tatou maua le saolotoga moni o Iesu, pe afai tatou te amio i amioga a Isaraelu o loo ta‘ua e Ieremia. E fai lenei ma lena, gaoi ma taupelopelo, tatou lolotu ma faafoliga oloo lelei mea uma, pei o tagata saoloto. E sisii lima ma pepese, ‘ua na o ia o lo‘u manao’, ae leai, tatou te mananao i le lalolagi ma ona tuinanau.
Fetalai Iesu, o le pologa, e le tumau pea ia i le aiga. Na o le atalii e tumau i le aiga. Afai foi tatou te pei o tagata Iutaia, tiga ona manaomia le fesoasoani ae faatalatu lava ma faapea, oloo lelei mea uma. Pe faapea, sa lolotu mai lava o laiti ma ua iloa foi le tali o le fesili; o ai na faia oe? O le Atua.
O le a faigata foi ia Iesu ona faasaoloto tatou. E le lava le iloa o Iesu e maua ai le saolotoga, e tatau na tatou salamō mai a tatou agasala, ma liliu atu i le mataupu a Iesu, ma tumau ai pea ma le loto filigā. Molimau le Tusi Paia, O lenei, pe a tuu saoloto oe e le Atalii, ona saoloto faamaoni ai lea o outou. Tatou faamaualalo nei, talia Iesu ma tumau i lona finagalo.
Aua le fefoifoiai, aua le masalosalo pe taumate lona alofa. E finagalo Iesu e faasaoloto oe ma a‘u, ma ia tatou tausi ana poloaiga, o le saolotoga moni lea. O le saolotoga tatou te valaau atu ai ma le loto tetele, ‘Ava! le Tamā. Soifua.