Afai e te asiasi mai i Samoa i lenei vaitaimi e te maua mai lava galuega faaauau o le alatele, o suiga ua iai nisi o molī auala ma faailo ua faatutū solo i magaala eseese i le talafatai o le taulaga.
Ua faapea foi ona vaaia le matuā tele o taavale i luga o alatele o Samoa, ma o le tasi lava o popolega tele sa tulai mai i le taimi lenei i le tausaga na tea nei, ina ua amata faamamalu le suiga o le itu o le alatele e feoai ai taavale, o le “mau faalavelave e tulai mai ma maumau ai soifua o le atunuu”.
O savali tetee na faaali ai le finagalo lē malilie o le atunuu i le faaiuga a le Malo e faatautaia ai ia suiga, ua fai mālie atu lava ma ua faagasolo nei e pei lava ona sa iai a o lei faia le suiga i alatele.
O se suiga ua ta‘ua nei e i latou na galulue i le Malo, auā le faatautaiga o a‘oa‘oga ma sauniuniga mo lea faamoemoe, o se suiga ua iloga le aogā o le tulai mai.
E lei mautu mai ni fuainumera e pei ona talosagaina ai le Pulega o Felauaiga i le Laueleele, ae o le lipoti ua aumai i le tatou ofisa – e lē o iai ni faalavelave tau taavale ua tuuaia ai le sese o le itu auala e feoai ai taavale talu mai le suiga.
E lē o iai foi ni faalavelave ua maua ai o le faaletonu o le avetaavale talu ai le suiga o le foeuli o taavale ua mafaua ai. O le tele lava o faalavelave tau taavale ua tulai mai ona ua faasuaava i latou na faafoeina le taavale.
O le faaiuga foi o le masina na tea nei o Aukuso na faalauiloa mai ai sala ua faapea ona faamamalu ma avatu i avetaavale ma le au faitaavale ina ia faamalosia ai tulafono faaopoopo ina ia saogalemu le suiga lenei o le alatele. O sala ua ave ia i latou e lē o faia se fusipau i le taimi e feoai ai taavale. O le sala o i latou e faaaogā pea telefoni feaveai a o faafoeina le taavale ma isi.
O le taimi lenei ua vaaia le malosi o tulafono nei ua faamaonia e le Palemene o Samoa, ma ua lima taitaiina ai le faatinoga o galuega a i latou e pei o le Matagaluega o Leoleo ina ia saogalemu feoaiga a le atunuu i luga o le alatele.
Faaalia i se fono a tusitala o le vaiaso na tea nei e le Ofisa Sili o le Pulega o Felauaiga i le Laueleele o Leasi Ioane Galuvao, o loo iloilo pea le Pulega i pasi laupapa pe faamata ua oo i le taimi e aveese ai loa pasi nei ma luga o le alatele ae faamalosia na o pasi faamalū, ae na ia ta‘ua e umi se taimi e iloilo ai lea tulaga faato‘ā mafai lea ona faama‘oti.
Ua silia i le lua tausaga talu ona pasia le tulafono e aveese ai taavale ia o pasi laupapa mai i luga o le alatele peitai e lei faamalosia lava ma na tele ina unai lea foi manatu ina ua suia le alatele ae na vaavaai foi i le taugata o le suiga o le a iai i le mamalu o le au faipisinisi o pasi.
O lea la ua toe lagā foi e le Pulega ma le faamoemoe e auiliili lelei lava le taimi e talafeagai ai ia suiga ona toe logo lea o le atunuu.
O le numera o taavale laiti laupasese na ioe le Pulega ua matuā faateteleina lava ma o le toatele o le atunuu sa lē mafai ona iai ni taavale e faafaigaluega ua aumai i aiga i Niu Sila le tele o a latou taavale mo ia atinae. O lea foi ua vaaia le sili atu i le 100 pasene le siitaga o le numera o pisinisi tau taavale faatau atu i le atunuu, ae e pei ona ta‘ua e le Alii Palemia, atonu o le tele o nei taavale o le a mafai ai ona vaai le atunuu i ni sa e pa‘ū lava o latou tau pe a fuafua i faatauga taavale sa iai e matuā maualuga tau o ia taavale.
O le tele o kamupani taavale ua mai i tagata Samoa sa galulue i Niu Sila, Ausetalia ma isi atunuu mamao, ma ua foi mai e faatutū pisinisi nei i le atunuu. Ua iai foi ni kamupani a papalagi ma ni alii Initia ua taulai lava i taavale faatau atu i fafo.
O le unai a le Pulega o Felauaiga i le Laueleele ina ia faatautaia loa a‘oa‘oga i le atunuu e malamalama ai le faaaogāina o le alatele ma ona suiga ua iai e pei o le faaaogāina o moli e kolosi ai, auā e toatele ua ta‘ua e Leasi Ioane ua na ona vaai i moli auala ae o le tele o taimi e lē o iloa foi faaaogā molī, e pei o le faataitaiga taatele o le oomi o le moli e kolosi ai ae o loo tu i autafa o le moli ae lē o tua tonu o le pine lea e oomi.
“O le computer ua fesootai ma ki o molī nei e tatau ona iai le mamafa o le tagata poo luga foi o le auala i le mamafa o le taavale e iloa ai le taimi e sui ai le molī ae o le toatele o i tatou e oomi le ki e savali ai ae e lē o tu i tua ane o le poloka lea e iai le faamau lea ma e tele ina tu i luma atu o le molī poo autafa e lē apoia ai e le computer o lea e iai se tagata e fia kolosi le alatele.
O taavale foi e sili atu loa i le laina kolosi i magaala nei e fiu e faatali le taimi e emo ai molī meamata e malaga ai,” o se saunoaga lea a Leasi i se fono ma tusitala. O a‘oa‘oga nei ua amata nei ona galulue i ai le Pulega ina ia mautinoa le faasalalau atu i le atunuu lautele.
E silia i le 1000 taavale ua aumai i Samoa talu mai le suiga ma o loo faaauau lava i le taimi nei lea tulaga, ma o le faamatalaga a le Pulega o le tele lava o ia taavale o taavale laiti laupasese.
