Saogalemu fanau aoga a Papa Puleia

O le sui faipule o Palauli le Falefa, o le Minisita foi lea o le Matagaluega o Punaoa Faalenatura ma le Siosiomaga, le afioga Faumuina Tiatia Liuga, na faafetaia le Malo o Ausetalia i lana fesoasoani ua mafai ona fausia ai se pa uaea e pupuni ai le vaega i luma o le lotoa a le Aoga Tulagalua a Papa Puleia, o se aoga i se tasi o nuu o lona itumalo faafaipule.
E $14,000 tala na faatau ai e lea Malo vaega uma o le galuega e pei o sima, pou paipa ma le uaea ua fausia ai le pa ua siomia atoa ai nei le lotoa.
O se galuega taua lea ua mafai ai ona puipui le saogalemu o fanau a le nuu o loo aoaoina i le aoga tulagalua mai le oo atu i le auala ma afaina ai i se taavale.
O nuu ma afioaga i tua i Upolu ma Savaii o loo molimauina e iai nisi o lotoa a aoga e le o iai ni pa uaea, ae ua faaalia o le a mafai ona oo i ai le galuega fesoasoani a le Malo o Ausetalia pe a talosaga i ai.
O le aoga a Papa Puleia ua leva tausaga e leai se pa uaea, ae ua faaalia e matai o le afioaga lo latou agaga faafetai i le sui o lea Malo i Samoa le alii Hai-Komesina o Matt Anderson, ona o lona tulai mai ua avea ma avanoa lelei e talia ai le latou talosaga mo se fesoasoani faapea.
Na faafetaia e le alii Hai-Komesina le galuega a le nuu i ona vaega eseese ona sa togi foi a latou maa i le fausia o le pa, aua sa ofo atu lo latou taimi e galulue ai faatasi ma le konekarate sa feagai ma le galuega.
Faaalia e Matt Anderson lona agaga fiafia ua tino mai le fesoasoani ua mafai ai ona puipuia fanau a le nuu mai le afaina i ni faalavelave tau taavale.
O fesoasoani faapea e le o silafia uma e le atunuu, ae ua faaalia e le Hai-Komesina e matala lava lona ofisa i soo se taimi e tuuina atu ai se talosaga mo polokalame tau atinae laiti e agavaa ai i ni fesoasoani faapea.
Talosia ia faaaoga i ai taimi o komiti a nisi aoga tulagalua o loo manaomia ni pa uaea e siomioa ai lotoa, e le gata ia malu puipuia ai fanau, ae ia taofi ai le sua e meaituaolo taaloa a nisi nuu e le tuupaina a latou meafafaga, aua o le isi lea faafitauli o lotoa a aoga e leai ni pa, o le sua faasoloatoa e puaa.
O Ausetalia le isi paaga a Samoa o loo le muta ana fesoasoani faifai pea mo le atinae o le tamaoaiga, atinae o aoaoga, ma le faaleleia o le soifua maloloina o tagata lautele.
Talu ai nei na faalauiloa ai foi e lea Malo le tuuina mai o ana fesoasoani e tusa lo latou tau ma le $21 miliona tupe Samoa mo le tausaga faaletupe 2009 i le 2010.
O vaega o loo faapitoa foi i ai ia fesoasoani, o suiga o le tau poo le climate change, soifua maloloina lautele, aoaoga, ma le faaleleia o atinae a pisinisi tumaoti.