O le vaiaso lenei e toe amata ai galuega masani a le Matagaluega o Leoleo ina ua faamae‘a ana tiute faapitoa o Aso Fiafia i le faaiuga o le vaiaso ua tuanai atu.
O se faafetai faapitoa na fofogaina e le Komesina o Leoleo ina ua mae‘a le lua o vaiaso o lenei tiute faapitoa a Leoleo auā le puipuiga o le saogalemu o le atunuu atoa i le vaitaimi o le Kilisimasi ma le Tausaga Fou.
Amata mai i le aso 20 o Tesema 2010, seia oo mai i le aso 6 o Ianuari 2011, na faamalosia ai tiute a alii ma tamaitai leoleo e to‘a 500 a le Matagaluega o Leoleo ma Falepuipui, ma e lei iai se vaipanoa o Samoa e lei iai ni Tiute Faapitoa nei a le Matagaluega auā le matauina o avetaavale e faasuaava faapea leoleoga o le ono tulai mai o ni faalavelave e ala i misa ona o fiafia o lenei vaitau faapitoa.
O le faafetai a le Komesina o Leoleo le Afioga Lilomaiava Fou Taioalo i se faatasiga a Leoleo i le mae‘a ai o a latou tiute faapitoa, o le leai o se tasi na molia i se solitulafono tau taavale ae o se solitulafono foi o ni misa i Aso Malolo.
E 21 i latou na taofia ma oo i ai leoleo e faafilemu ina ua valaau atu i lala eseese a le Matagaluega, ma o le toatele lava na ta‘ua e le Sui Komesina o Leoleo, le Afioga Leaupepe Fatu Pula, na taofia e Leoleo ma lapataia ona na maua o feoai i taavale ae o loo faasuaava ma na maua uma i sailiga a Leoleo na faaaogā ai mea mānava le breathalyzer.
Ua sao lenei Kirisimasi ma le Tausaga Fou ua leai se soifua maumau i luga o ala tetele ma ni misa e ono tulai mai ma na faapea foi ona faafetaia e le Matagaluega Pulega a nuu taitasi o Samoa na mafai ona leoleoa fiafia na faatautaia i totonu lava o afioaga uma o le atunuu, aemaise vaega e lei oo i ai leoleoga a le Matagaluega o Leoleo.
O i latou uma o Malu o le Malo na valaauina mo le tauavega o tiute faapitoa, e lē maua ni totogi ovataimi ae o le faasologa e pei ona masani ai le Matagaluega o Leoleo e faaopoopo uma itula ia na ova ai tagata faigaluega ma maua ai aso malolo o Leoleo.
O se faiga lava lea ua vaaia foi i Matagaluega a Leoleo i isi atunuu e pei o Niu Sila ma Ausetalia.
O le fiafia a Leoleo mo le faaiuga o le Tausaga na faato‘ā fai lava foi i le faaiuga o le vaiaso na tea nei ona na tolopo uma fiafia o le faaiuga o le tausaga seia mae‘a lelei tiute faapitoa na valaauina ai leoleo mo Aso Fiafia.
Na laga foi e le Sui Komesina o Leoleo, Leaupepe Fatu Pula, le alofagia o tiute a Leoleo i le ao ma le po. Na toatele lava le atunuu na alolofa ane, e pei ona faaalia e Leaupepe, e ala lea i taumafa ma vaiinu na faapea ona momoli ane i soo se vaega na tiute ai Malu o le Malo. Ua toe faagasolo nei la i lenei vaiaso galuega masani a Malu o le Malo.
