Ua folasia e le Komesina o le Matagaluega o Leoleo ma Falepuipui, afioga Lilomaiava Fou Taioalo, se ata manino o le tulaga lata mai o faamaumauga o solitulafono e lipotia atu i le matagaluega, amata mai ia Ianuari e oo ia Iuni o le 2010.
O ni fuainumera e faateia ai tele pe a fua i le maualuga ma le saoasaoa ua iai solitulafono o le gaoi ao avea ma tagata faigaluega, faapea le talepe fale ma ave faagaoi meatotino, aemaise o le solitulafono o le faomea, lea na osofaia ai mo le taimi muamua se faletupe i le aoteatea.
O le fono a le faalapotopotoga o le au faipisinisi i le atunuu na folasia ai e le komesina se lipoti e tusa ma faamaumauga a lana matagaluega lea na ia faailoa ai le maoa‘e tele o le tulaga lamatia o pisinisi i solitulafono o le talepe fale ona e toesea ai meatotino, mai lava i tupe e oo i oloa.
O faamaumauga lava ia o le tausaga nei talu mai le masina o Ianuari e oo mai ia Iuni, e 275 talepe fale na lipotia i leoleo.
O le 20 pasene o ia soligatulafono uma na aafia ai faleoloa ma isi ituaiga o pisinisi.
O le talepe fale ma le gaoi e 79 solitulafono i totonu o lea vaitaimi ma ua 44 pasene ua siitia ai pe a faatusa i le vaitau o Ianuari ia Iuni o le tausaga ua mavae.
O loo apo e le Matagaluega o leoleo faaletonu o feagai ma le atunuu i nisi o vaega e pei o le taugata o le soifuaga ua avea ma se isi mafuaaga tele o le faatupulaia o ia ituaiga o solitulafono.
Ua tapena e le matagaluega o leoleo nisi o auala mo le puipuia o meatotino a le au faipisinisi ma le atunuu lautele, e taumafai ai e faafetaui ia solitulafono e pei o le saunia lelei o vaega faaonapo nei mo le iloa o se tagata e osofaia se faleoloa ma se pisinisi.
O nisi o i latou o loo molia ai o tagata lava sa molia muamua foi. O se fautuaga malosi a le komesina o leoleo ia i latou e pulea pisinisi ina ia taumafai e alofia le talia o oloa gaoi e faatau atu ia i latou auā o se solitulafono.
O se taimi muamua lenei pe a fua i nofoaiga a nisi o Komesina o lea matagaluega i nai tausaga e lei mamao tele atu, ua aumai ai i luma ni faamaumauga o solitulafono ma lo latou aofaiga, atoa ai ma le ioeina e se faauluuluga filifilia o le tulaga siitia o ituaiga o solitulafono taatele, e pei o le gaoi ma le talepe fale, ma le limatagovale a o avea ma tagata faigaluega.
O nisi ia o solitulafono ua molimauina le tumutumu ai o aiga i le fale faamasino i le tapuaia o o latou tagata aemaise lava i tupulaga o alo ma fanau sa galulue i ni kamupani, o pisinisi, faapea ma faletupe.
Atonu o se isi lea atugaluga o le matagaluega o leoleo i le aafia o pisinisi i nei solitulafono, ona e lē gata o le au talepe fale, ae o tagata faigaluega e aafia ina ua tuuaia ma molia i le luluu o tupe poo isi oloa ma meatotino a kamupani ma pisinisi.