Ua iai foi le isi matati‘a ua faatū e Samoa pe a faatusatusa i ona tuaoi o le Pasefika. I le tele o tausaga na o Ausetalia lava ma Niu Sila na mafai ona sao atu ona sui taaalo i Taaloga Faapitoa o le Olimipeka mo i latou e iai mana’oga faapitoa.
O le tausaga lenei o le a faamauina i talafaasolopito o atina‘e o i latou e iai manaoga faapitoa. E lē gata i lea o talafaasolopito o atina‘e tau taaloga i Samoa, ua mafai ona ofi atu ai Samoa i nei faagatama faavaomalo. O se laasaga tele pe a fuafua i le laitiiti o Samoa, ae ua manino lava le malosi ma le naunau o i latou o loo vaaia nofoaga tau a‘oa‘oga ma nofoaga tutotonu o i latou e iai manaoga faapitoa, ina ia laalaa i luma a latou taumafaiga. E lē gata i a‘oa‘oga, o le malosi e mafai ai ona faatino soo se manaoga e tuu i ai le loto, a o lea foi ua vaaia i taaloga.
E toavalu (8) ni alo o Samoa mai le aoga o le Loto Taumafai ua filifilia nei mo le Olimipeka Faapitoa mo i latou e iai manaoga faapitoa, lea o le a talimalo ai le Malo ma tagatānuu o Eleni (Greece) i le aso 20 o Iuni o le tausaga nei.
O se sauniga faapitoa na faatautaia i luma o le Maota o le Malo i Matagialalua i lenei vaiaso e faalauiloa ai e le Malo i latou ua faamanuiaina i lenei faamoemoe.
O se solo a le fanau aoga mai le Loto Taumafai ma le aoga a le Fia Malamalama ma le vasega o Faiaoga faatasi ai ma ni isi o sui mai le Kamupani a le Digicel na amata mai le auala laupapa i Vaisigano ma faaiu ai i luma maota o le Malo.
O le afioga i le Ao mamalu o le Malo ma lana Masiofo na faafeiloaia lea solo faatasi ai ma le afioga i le alii Palemia ma le Minisita o Aoga, le afioga ia Magele Mauiliu. O le afioga i le alii Palemia na saunoa i le saunoga autū o le aso ma na ia momoli le faamalo mo le au filifilia lea o le a auai atu i Athens Greece mo le taimi muamua.
“Na o Ausetalia ma Niu Sila e iai a latou ‘au e masani ona auai atu i ia taaloga, ae o Samoa le atunuu muamua o le Pasefika o le a auai atu i ia taaloga faavaomalo”, o le saunoga lea a le afioga i le alii Palemia ia Tuilaepa Sailele Malielegaoi i lana saunoaga autū. Na ia ta‘ua foi ua silia ma le 40 tausaga talu ona auai Samoa i taaloga a le Olimipeka a le lalolagi, ae e lei ausia lava se pine auro.
Ae o le a lafo atu le faatuatuaga i le to‘a 8 lea e maua mai ai se pine auro mo Samoa i taaloga o le Olimipeka faapitoa. Manatua foi o loo iai le ofo a le Malo, soo se alo o le atunuu e ausia se pine auro mai i taaloga o le Olimipeka e mafai ona ofo i ai e le Malo o Samoa se tinoitupe e $100,000 (tala Samoa). E lei saunoa i ai le Alii Palemia pe aofia ai ma Olimipeka faapitoa ae afai o le maualuga lea e oo i ai o lona uiga e ono laki se isi o le fanau lenei i se tinoitupe tele pe a maua se pine auro mai i ia taaloga.
O le susuga ia Pepe Fruean na avea ma sui o le kamupani a le Digicel ma na ia saunoa, o le tolu tausaga talu ai sa iai se miti e auina atu se ‘au a Samoa i le Special Olympics a o lea ua tino mai lenei miti mo Samoa. E tusa ma le $81,000 (tala Samoa) le foai a le Digicel ua tauaao atu i nei fanau o Samoa mo ia taaloga, ma o le tele o le tupe o le a fesoasoani ai i pasese o le au taaalo auā o le nonofo ai ma le tausiga o le a faatautaia lava e le aai o loo talimalo i nei taaloga tetele.
Faaalia e Pepe Fruean, o le a faaauau le fesoasoani a le Digicel ia i latou e iai manaoga faapitoa e lē gata i taaloga ae faapea foi i taumafaiga ua faatino i Samoa auā lo latou atina‘e faalea‘oa‘oga ma faale tagata soifua ia faafaigofie.
E 185 atunuu eseese o le a auai a latou ‘au taaalo ae e silia ma le to‘a 7,500 le aofai o alii ma tamaitai o le lalolagi e iai manaoga faapitoa o le a tausinio i ia taaloga ma o le a tuua e lea aumalaga le atunuu i le aso 15 o Iuni mo lea faamoemoe.
O le Kamupani a le Digicel faatasi ai ma le Malo o le a faatupeina le auai atu o ia alo faatasi ai ma le aumalaga atoa mo lea faamoemoe.
O le to‘a 8 o nei alo ua filifilia ua vaevaeina ia latou taaloga, ma e to‘a 4 i latou ua filifilia mo le taaloga o le faataavalepolo, e to‘a 2 alii ma le to‘a 2 mai i le vaega o tamaitai. Ma o le isi toafā ua filifilia mo le vaega o taaloga tamoe e aofia ai le 50 mita, 100 mita, 200 mita ma isi taaloga e pei o le oso mamao ma le togi polo mamao.
O suafa na o alo e to‘a 8 o le a malaga atu mo le faamoemoe i Greece i le masina o Iuni o le tausaga nei:
Fouina Ronnie Fuiavailiili Tauvao – Leufisa
Letaofia Taloapatina Tuiletufuga – Apia ma Vaivase-uta
Shontelle Caroline Ah San – Tufuiopa
Aiga Tufuga – Asau
Vaamao Udo Onesemo – Vaivase-uta ma Malaemalu i Falealili
Ianeta Nuualiitia – Siumu
Alaiafi Auvaa Pese – Satuiatua ma Magiagi
Saleilua Matautia – Tulaele ma Vaitele
