Samoa mo Misiona

Na tatala aloaia le sauniga sa faataunuuina i Brisbane ua faaigoaina o le “Samoa for Misssion*, o se faalapotopotoga tuufaatasi a alii ma tamaiti Misionare Samoa o loo galulue i totonu o atunuu eseese o le lalolagi i lalo o le faamalu a le YWAM poo le Tupulaga mo Misiona.
O lenei faalapotopotoga soo faatasi, o ni koneferenisi e potopoto ai i latou mo faamalosiau aemaise o le sootaga a alo Samoa Misionare, e pei ona faataunuuina i le aso Faraile 18 o Setema.
O le fetalaiga Vaaaoao Alofipo na fai ma fofoga a le mafutaga a le Samoa for Mission i Kuiniselani e faafeiloai aloaia ai malo Misionare mai i itu e fia o le lalolagi ae tainane fo’i Tupu ma Tamalii o Samoa potopoto i Purisipeni faapea le mamalu i Faafeagaiga i fata faitaulaga e fia ma
Ekalesia taitasi.
O sui taitasi na auai mai atunuu eseese – e aofia ai Rev Faatui ma Elisapeta Laolagi (Taitai Samoa for Mission Amerika Samoa), Rev Nuuausala & Manu Siaosi (Taitai Samoa for Mission Apia Samoa), Usufono Fepuleai (Misionare Samoa/Taiwan), Puipuifatu Malama Piliae (Misionare Hong Kong), Troy & Ruth Gentles (Misionare mai Saina), Leaula Silo Schmidt (Misionare mai Bangladesh Initia).
O le Komiti Faafoe Samoa for Mission Qld o loo taitaifono ai le Susuga Leivi Mulitauaopele, Sui Taitaifono – Pastor Faamanuia Aloalii, Failautusi – Seiuli Tielu Petaia, Teutupe – Muagututia Sio Leo.
O se faaiuga o le vaiaso sa vaaia ai le faamanuiaga a le Atua i le matagofie o polokalame sa faatinoina aemaise sa faatumulia ile paia ma le mamalu ole atunuu o alala ma papa aao i Kuiniselani. Na taape le fuamanusina, tofu le gogo ma si ana i’a i faalumaga taua o lea foi semina.