E faigata ona maua upu e faamatala ai le lagona ootia ma le faanoanoa talu mai ona maua tala i le mafuie matautia i Samoa, faapea le galulolo ua afaina ai si o tatou atunuu ma maliliu ai le toatele o tatou aiga, uo ma e masani.
Ou te talitonu e leai se tasi i Niu Sila e lei popole ma taumafai e faafesootai vave nai aiga i Samoa pe o faapefea mai i latou, ina ua maua faamatalaga i lenei faalavelave matautia.
E tele tala ua maua mai nei, i le malosi o le galu, ma momomo le loto i le toatele o aiga ua maliliu ona o lenei faalavelave matautia, ae maise si fanau laiti ma nai matua.
O le toatele o aiga ua le na o se toatasi ua toesea, ae ua maliliu le toatele o le aiga.
Ua silia ma le 150 tagata ua mautinoa ua maliliu, ae o loo faaauau pea galuega e saili nisi o lo o masalomia ua tafefea i lenei faalavelave.
Ua tali le Malo a Niu Sila ma ua lagolagoina atoatoa e le Leipa ma nisi vaega faaupufai o le Palemene se fesoasoani tupe e toe atinae ma fesoasoani i le toe fausia o nuu ma alaalafaga ua faatamaia.
E tele foi nisi atunuu ma faalapotopotoga tumaoti ua ofoina mai a latou fesoasoani mo Samoa.
Ua faamaoopoopoina nei e le Konesula o Samoa ma nisi tamalii iloga o Samoa, ma lagolagoina e susuga i faafeagaiga se Komiti Faapitoa mo le faamaoopoopoina o auala e mafai ai ona fesoasoani tatou aiga o loo i Niu Sila i o latou aiga ua aafia i lenei faalavelave.
O le vaiaso nei o le a faamautu ai se Ofisa Tutotonu i le Maota o Samoa i Aukilani e mafai ona tali fesili ma fautuaina tagata lautele i auala e mafai ai ona fesoasoani atu i Samoa.
O le a faasalalau atu ise taimi oi luma nofoaga o le a saunia ai containers mo faamomoli mo aiga i Samoa e aunoa ma se totogi.
O le a iai se nofoaga i Manukau ma West Auckland.
O lo o fuafuaina foi ni sauniga lotu e tu’ufaatasi mo Manukau ma Aukilani ma e toe logo aloaia atu mo le tou silafia nisi faamatalaga i nei fuafuaga pe a maoti mai.
O loo tapena foi e lenei komiti ni auala saili tupe o le a faafiafia ai alo o le atunuu ua talenia ma lauiloa i pese ma le musika e aualofa ma fesoasoani atu ai i le toe tau atinaeina o nuu ma alalafaga i Samoa. E toe faasilasila atu ia aso pea mautu mai fuafuaga.
O le aso Toonai le aso 10 o Oketopa ua fuafuaina e faia ai se taaloga faapitoa o le aulakapi liki a Samoa e taaalo ai Reuben Wiki i le au a Samoa i le malae o Mt Smart.
O le a faafiafia ai le Yandall Sisters ma nisi mai Dawn Raids. Ua malilie le komiti o le lakapi liki o se tupe e aoina mai i lenei taaloga o le a ave e fesoasoani ai i Samoa.
O le afioga ia Vui Mark Gosche o loo galulue ma le iuni o le lakapi liki a Niu Sila ina ia faamautu lea fuafuaga. O le a faasalalau atu i se aso o lenei vaiaso mo le silafia o
le atunuu nei fuafuaga.
O loo tapenapena foi ni fuafuaga a nisi o alo ma fanau Samoa ua talenia i le tusiata o le a faia se faaaliga faapitoa o a latou galuega tusiata, i ni masina oi luma e saili ai foi se fesoasoani tupe e faaagaga mo le toe fausia o faleaoga i aai ua faatamaiaina e le galulolo matautia.
O loo taulamua ai Fonofale McCarthy ma Fatu Feu’u i lenei fuafuaga. O le a fofogaina atu foi lenei faamoemoe pe a maoti ma mautu mai le polokalame o lenei taumafaiga.
Ua tele fuafuaga ua amata nei ona faagasolo ona o le manatu alofa ma le fia fesoasoani o le toatele mo si o tatou atunuu peleina o Samoa ma nai o tatou tagata.
Faimai se tasi o tama matua ia te au, “E alofa tele le Atua ia Samoa, ma o le mafuaaga lea ua maliliu ai se vaega toalaiti, ae sao le toatele.”
Ia Samoa e, ia tumau ma mausali lo tatou faatuatua. Ia tatou loto tetele ona o lenei faalavelave ua tatou aafia ai. Ia maua pea le loto onosai ma le loto toa. Ia faamafanafana atu lo tatou Atua i ai latou ua mafatia ona o le toesea o nisi ua pele ia i tatou.
Ia tatou tepa taulai pea i luma ma le mautinoa “E toe susulu lava le la ma e mulimuli le malamalama i le pouliuli.
