Tusia: Leilua Jerry Uesele
Sini
E tasi lava le ‘ai na malolo ai le Samoa A 18-17 ia ACT i Canberra i le Aso Toonai na tea nei i se taaloga mataina. O le Aso Lua na fetaui ai ma Argentina Pampas lea foi na iloga ai le malosi o Argentina na malo 38-24, ae tolu aso sosoo ai ma le taaloga ma ACT XV.
Ua toe taliu mai nei i Sini le Samoa A e faatali ai le taaloga a Argentina ma Tonga i le Aso Lulu, a manumalo Argentina lona uiga o le a iai se avanoa o le Samoa A e fetaui ai ma Fiti A i le Aso Sa nei, 23 Mati. E lei faia‘ina Argentina i la latou pulu ma Samoa A. E toafā sui o le Samoa A na lē mafai na taaalo i lana taaloga faaiu o le pulu ma le ACT XV talu ai ni faasalaga mai le taaloga ma Argentina i le Aso Lua talu ai.
Na aafia i le toafā lenei le alii kapeteni ia Maselino Paulino, Ausetalia Vaiomanu le Hooker (lua vaiaso), Afioae Maiava le loka (tasi vaiaso) ma le fulupeki ia Tila Mealoi (tasi vaiaso). O nisi nei o poutu o le ‘au ma o le laina i luma sa faamoemoe tele ia Paulino, Vaiomanu ma Maiava ae o la tatou fulupeki ia Tila Mealoi na sikoa uma i taaloga e lua i Sini nei ma Waratahs A faapea Tonga A.
O le aufili nei a Argentina A o se ‘au malosi e toatele nisi o le aufili na auai mai ai lea ua fuafua e ulufale mai ma se ‘au faaopoopo a Aferika i Saute i le tauvaga Supa 17 ua fuafua mo le 2016. O le aufili a ACT XV lea na malolo ai le Samoa A 18-17 na aofia ai foi nisi sui o le Brumbies e pei o Joe Tomane ma o se ‘au malosi tele.
Ua tapuaia nei e Mailo Potu Leavasa le faiaoga, Masoe Stephen Betham le faufautua, ma Vaaelua Aloi Alesana le taitai malaga, auā so latou toe avanoa e ono fetaui ai ma Fiti i le aso nei.