Fai mai le saunoaga, Rev. Isaia Tiatia, “O le tautua a tausi soifua i Lalomanu, o le ofisa o leoleo, o ofisa o faasalalauga faapea i latou e pei o le Samoa Health Mission mai Niu Sila, o nisi na o Samaria agalelei o le sunami Samoa.”
“Ua uma lelei lenei aso o o’u feagai ma sauniga e faamanatu ai i latou na maliliu i le sunami, peitai e ese ai le sauniga lenei.
O le sauniga e faatauaina ai le tautua ola a ofisa eseese o le Malo faapea fesoasoani mai fafo sa agalelei mai i le puapuaga o Samoa.”
O le Toeaina Faatonu ia Isaia o ia o le faafeagaiga taulagi a le afioaga o Lalomanu sa saunoa i le lotu faapitoa sa faia i le Falemai Faaitumalo i Lalomanu i le afiafi o le Aso Lulu 29 Setema 2010, lea sa atoa i ai le tausaga talu ona afatia Samoa i le sunami.
I le molimau i lea afiafi a Tautala, le tamaitai pule o tausi soifua i Lalomanu, “O le taimi lava na amata taunuu mai ai tino maliliu ma i latou na manunua i le falemai, o le taimi foi lea na le mafai ai ona taofia loimata a o tau mai galuega laveai. Na logo mai a’u e lo’u aiga i Lepa ua leai so matou
fale ae faatoa ou taunuu i le galuega i lea taeao.”
Sa faapea foi ona molimau le susuga ia Elikapo, le taitai o le Ofisa o Leoleo i Lalomanu i tulaga faigata sa feagai ma le Matagaluega o Leoleo, aemaise lava le sailiga o tino maliliu na tanumia i laau ma fale i le faasolo atu i le lua i le tolu aso talu ona uma le sunami.
O le tofa Vaasiliega o le ofisa faasalalau o le 2AP sa molimau i le taumafaiga e fetuutuunai le gagana o faasalalauga ma fautuaina le taofiofia o le pueina o ata o le sunami ona o le agaga alofa i se faalogologo mai ma se matamata mai a aiga ma fanau i tulaga tuga o le faalavelave, aemaise i
latou i atunuu i fafo.
I le molimau a Togiaioatua Vaifagaloa le taitaifono o le Samoa Health Mission i lea afiafi, “E tolu sefulu ma le valu tausi soifua Samoa mai le Samoa Health Mission na galulue i Samoa i le taimi o le sunami. Na maua loa le tala, tu ma savali.
O le toatele na totogi lava le pasese o le tagata ia ina ia vave taunuu mai i Samoa e fesoasoani.”
I le mae’a o molimau sa tutuina ai loa moliga’o a o saunoa le Toeaina Faatonu ia Rev. Isaia e faapaia le lotoa a le falemai i Lalomanu ma ia aveesea ai ni manatu o loo iai agaga o e na feoti i le lotoa a le falemai.
“E leai ni agaga o tagata ua maliliu o feofeoai i le lotoa nei, ae iai agaga leaga pe afai e vaivai lo tatou faatuatua i le Atua ona tau faafefe lea i le aufaigaluega.”
Fetalai Pa’u Fereti Puni sa auai i lea afiafi, “O le iai o lenei lotu faapitoa o se auala lelei ua mafai ai ona faatauaina auaunaga na pa’u i ai le mamafa o galuega laveai.
O le auai o le Samoa Health Mission i lenei sauinga ua fai ai i latou ma sui o le anoanoai o Samaria agalelei sa alolofa mai mo Samoa.
E moni o loo mafuli pea le lagolago i aiga sa maliliu o latou tagata, peitai e tele foi le afaina o mafaufau ma lagona o i latou sa feagai ma galuega laveai o le sunami.”
O le sauniga i le falemai i Lalomanu o le lotu lea na taualuga i ai sauniga o le aso faamanatu o le sunami, 29 Setema, ma sa faasalalau tuusa’o i luga o le 2AP.