Samaina le Tatau a le tamā 64 tausaga Na o le 15 tausaga o le Tufuga ta Tatau

A oo ina a‘e i fanua se faatamasoalii i le tai ona faapea lea ua tautai a‘e le faatamasoalii. Afai foi e a‘e malo le seuga, ona faapea lea ua matalupe le seuga, o faiva fo‘i e tapuaia e a‘e ma le manuia.

A faaifo foi se lagimalofie e tapuaia lelei aua o se faamoemoe e faailoga fesili lona taunuuga, pe tua i le lagi soifua pe leai.

O lagona o le agaga fiafia ma le faafetai i le Atua ina ua faaiuina ma le manuia le faaifoina o le malofie a le Tofa a Laulu Kaisa Agavale.

O le paia lava lea aua Leilua ma le Toalima o alii. Sa Alalatoa ma alo o Malietoa ma oe le Matua ma lo oulua Tuilagi ma Namulaulu maopu i tufuga malegaaimalae le lauti na laulelei ia te oe Safotulafai.

O le Tofa ia Laulu Kaisa Agavale ua 64 tausaga le matua o lona soifua, ae sa le mafai lava ona aveesea le lagona e fia laei i le tatau a Samoa.

E lua vaiaso sa faatino ai le galuega ma maea ai. O le aoauli la o le Aso Lua aso 4 Aukuso 2009 na samaina ai le tatau a le Tofa a Laulu, na molimauina e aiga ma uo.

O le susuga i le agaiotupu sa nafa ma le faatinoina o le galuega o le afioga ia Tulouena Andre Tanuvaso e na o le 15 tausaga le matua, o se tamafanau lava o le aiga o le Tofa ia Laulu.

Sa faatinoina i lea aso tulaga masani faaleaganuu, ona alo ai lea i le taumafataga sa saunia e le mamalu i aiga.

Malo lava fai o le faiva.