Faagasolo pea le galuega a le susuga i le matuaofaiva le afioga ia Faamausili Peni ma ona alo e toalua o Faamausili Fiu Feleti ma Faamausili Ioane, i le faatinoina o le taleni ma le tamaoaiga o le Atua ua faamanuiaina ai i latou e ala i le ta-tatau. E tusa ma le tolu vaiaso na faagaioi ai le galuega a le afioga i le agaiotupu Faamausili Fiu Feleti ma lona soatau i le taina o le susuga ia Lino Nuu Tominiko ma le alo o si ona tuafafine, le tamaitai o Vaisamoa Kalo.
O le Aso Toonai talu ai na faapaiaina ai ma ave ai foi le viiga ma le loto faafetai tele i le Atua ona o lea ua faaiuina ma le manuia le galuega fita a le afioga i le agaiotupu ma lona soatau.
O se mitamitaga sili foi lea i le susuga ia Lino ma le tamaitai o Vaisamoa auā o lea ua mapu ma ua taunuu le faamoemoe aua e lei faigofie ona e na o lē e toa le loto na te ausia foi lenei laasaga o le laei i measina a si o tatou atunuu.
Saunoa le faletua o le susuga ia Lino ua laei nei i le tatau, le tina ia Ema Tominiko, o se fiafiaga sili ma o se avega ua matuu atu le mae‘a ai o le taina o si ona alii, auā e faigata foi le vaai ma le faalogo atu i le oi mai i le tiga ma le matuitui o faiga a le autapulu i taimi o le taaga.
E mae‘a ane le galuega a le matuaofaiva, o loo auai lava le tina matua o Taumaloto Nuu mai Samoa i le tapuaia lelei o le taaga a nai ona alo, ma ua lagona ai foi lona fiafia ma le faafetai i le Atua, auā o lea ua manuia le faamoemoe ma ua sauni ai loa mo le toe foi atu i Samoa.
Ia o upu masani lava e fai, ia manuia ma ia atamamai lava e tauave le laeiina o measina a si o tatou atunuu. Lagona le loto faafetai o le afioga i le agaiotupu ma lona faletua, le afioga i le meana‘itāua ona o faaaloaloga matagofie na tapenaina ma saunia lelei e le tina ia Taumaloto ma ona alo, ma le aiga atoa auā lava le pelega o le galuega e pei ona masani ai o tatou faamoemoe faapenei.
Na ta‘ape foi le auvalaaulia ma le fiafia ina ua tali le sua ma faamalieina le laualo i le taumafataga matagofie na saunia lelei e nai aiga o le susuga ia Lino ma le tamaitai o Vaisamoa mo lea aso.
Ia malo le onosai, malo foi le lototele aemaise o le lototoa auā o lena ua tau lau o lo oulua faamoemoe, ua iu manuia faiva o le afioga i le agaiotupu, ua leai se faaletonu poo se faafitauli e tupu ona o le faatasi mai o le alofa o le Atua.
