Sama le tatau a le Malu o le Malo

Na matuā silaloa le maimoa a alii leoleo papa‘e sa auai atu e molimauina le samaga o le tatau a si o latou uso galulue, le susuga Henry Soloi Tofilau, e pei ona faatautaia i le Riverside Community House i Mt Wellington.
O le afiafi o le Aso Tofi talu ai, aso 1 Aukuso 2013, lea na alo atu ai le Afioga ia Faumuina Siaosi Tofilau ma le faletua ia Pepe Tagiilima Belford Tofilau, faapea o la aiga uma sa maua le avanoa e auai atu, mo le faatasiga fiafia e faapine ai foi le mae‘a o le galuega a le Agaiotupu ma le Aigasalemalama, i le samaina o le pe‘a poo le malofie a le susuga ia Henry Soloi Tofilau, e pei ona faamae‘a ai i le vaega faaiu o lana tā i lea lava aso, ae sama i le afiafi.
Ina ua fesiligia Soloi pe aisea lava ua naunau ai i le laei a le atunuu, na ia ta‘ua ai, o lona faanaunauga lava ina ia faaauau pea ona fesootai vavalalata atu pe ia mausalī lona piitaga i le tino ma le agaga i lona faasinomaga, o lona tupuaga o ia o se alii Samoa. Na ia ta‘ua, i le itu a lona tina, na gata lava i si ona grandfather ua leva ona maliu, se tasi na iai se tatau, ma e moni lava e iai foi isi ona tauaiga o loo tatā, ae mo le latou lava aiga totino, e lei toe iai se isi na laeiina le tatau. O le ala lea sa pei ai lava o se lagona malosi na musuia ai pea lona mafaufau mo se taimi umi, e manao lava e toe sosoo e ia le tofi lea ma le atoaga o le ta‘ua o ia o se alii Samoa, pe afai e pipii ma le malofie a Samoa i lona tino se‘i vaeane le aufaitau.
O le isi itu na ta‘ua e Soloi, faapea foi i se faamautinoaga mai lona tuaa, le tina ia Pepe, e ese le malosi o le agaga fia Samoa o le faletua o le alii o Soloi, ae o se tamaitai palagi.
O lona faletua ia Natalie, na sili ona faamalosiau ia Soloi e ta lana tatau, ma e oo foi i le faagasologa atoa o le taimi o feagai le alii Malu o le Malo ma le tāina o le tatau, e lei nofonofoai le tamaitai palagi, ae faia mea uma e faalototele ai lona toalua ina ia mae‘a lelei le galuega.
Ma sa vaaia lava i lena afiafi, e muliga foi le mitamita o Soloi ma lona aiga ina ua tau lau o le faamoemoe, i le matuā vaaia o le nenee o le faletua, ma faailoa atu i ona aiga palagi ma a la uo uma, o ia lava o le avā a le alii Samoa ua laei i le measina a Samoa. O le Faafeagaiga, Susuga Rev Misikopa Loli na taitaia le sauniga puupuu ma momoli foi sina upu faaleagaga e faamalo ai i itu uma e lua sa aafia, o le alii o Soloi na tā le tatau, faapea le faamalo i le Matuaofaiva le susuga ia Tulouena Maleko Lesoa ma lana Meanaitāua, le faletua ia Stella, faapea le latou vaega atoa mo lenei galuega fita sa feagai ai. E 11 tāaga a le alii o Soloi ma o le vaega faaiu lava e 11 i ai vaega, lea na faauma lava i le Aso Faraile lea, ma sama ai loa le tatau i le afiafi.
O le uso o Soloi, na avea ma Fofoga o le afiafi, le susuga ia Graham Tofilau, ma na uma le sauniga faapitoa, ona faafeiloai atu loa lea o aiga uma ma uo, ma faia sina sausaunoaga puupuu, sosoo ai le taumafataga, ma faaiu ai i faaaloaloga masani faaleatunuu i aso faapea. O le Susuga Soloi e galue o se alii leoleo i le vaega o leoleo faaaupegaina a Niu Sila, ma sa auai atu le toatele o ana uo leoleo i lea afiafi, e maimoaina lenei aganuu tutasi a Samoa ua faatino e se tasi o a latou uo galulue. O Soloi ma lona faletua le tamaitai palagi o Natalie, e toatolu o la alo tama.
O tupuaga o le susuga ia Soloi, o lona tamā o le Afioga Faumuina Siaosi Tofilau mai alalafaga o Iva i le Faasaleleaga ma Papa i Puleia i le motu tele i Salafai, ma lona tina le faletua ia Pepe Tagiilima Belford Tofilau mai ona alalafaga o Saleilua ma Salesatele i Falealili.