Na matuā faaleo le agaga faafetai o Sa‘u Papalii Lalotoa Sa‘u ma le faletua ia Gonetti Theresa Sa‘u, muamua i le Atua silisili ese ona ua mafai ona faataunuuina faamoemoega e pei ona sa alo faiva i ai le Matai tufuga ia Tuifaasisina Fuga Saofaga faapea lana aufaigaluega.
O lenei faamoemoe e fā masina sa faia ai ona sa fua lea i galuega masani o le vaiaso a Sa‘u aemaise ai foi le susuga i le Matai tufuga ma lana aufaigaluega.
Sa faafetaia le afioga ia Tuifaasisina ma le lautele o le aufaigaluega ona o lenei galuega sa na o se moemitiga faivavale a le tupulaga, ae pe ana leai i latou o loo tauavea lenei taleni semanu e lē mafai ona tino mai, aemaise ai foi o le alofa o le Atua soifua.
Ta‘ua foi e Sa‘u lona loto faafetai ona ua mafai ona faataunuuina moemitiga o si ona tamā ia Sa‘u Papalii Kemi aemaise ai foi o o latou tuaa, ina ia mafai e se tasi o le fanau n ate ausia lenei faagatama e pei ona iai lea aso ma le samaina o le sogaimiti o se tasi o le fanau.
O se tasi o mitamitaga sili ia Sa‘u Papalii Lalotoa Sa‘u, ona o ia o le ulumatua o le fanau e to‘aono a o latou mātua, ae o lea ua mafai ona ia faataunuuina lenei faamoemoe i le lagolagosua o lona aiga, aemaise ai o si o‘u toalua ma le ma fanau.
E iai le talitonuga o Sa‘u o lona laeiina o le measina a lona atunuu, o le a avea lea ma se poutu malosi i lona olaga auā le tautuaina o lona aiga aemaise o le Atua ma lona finagalo, e pei ona faia e lona tamā ma ona tuaa.
O Sa‘u Papalii Lalotoa Sa‘u e mai le afioga o Apolima Uta, ma le faletua ia Gonetti Theresa Sa‘u e mai afioaga o Leone ma Luatuanuu. O Sa‘u o le alo ulumatua o le tama ia Sa‘u Polofaasili Papalii Kemi o Apolima, ma le tina ia Maota Papalii Sa‘u.
