Sama faatasi le tatau ma le malu a le tamā ma lona alo tamaitai

O Tiaseugā  Fesola‘i Taualagi Pritchard na malaga i Samoa mo nisi o tuatuagia faaleaiga ma taina ai lana tatau, ae o le toe taliu mai i lana faigamalaga ae fetaui ma le taina o le malu a lona alo tamaitai ia Valerie Tala Pritchard mai Vaigaga & Faleasiu.
O se faatasiga manaia ma le matagofie na mafai ona maua e aiga i le aoauli o le Aso Toonai aso 10 o Aukuso. Sa siitia le taulaga faafetai e le susuga i le faafeagaiga ia Ps Kilisimasi Hytongue,(AOG itu Oxley), e pei ona auai ma le faletua ia Bessie Hytongue.
Sa auai foi nisi faafeagaiga le susuga ia Tafeamaalii ma le faletua ia Lesina Uta‘i, faapea Lauta ma le faletua ia Alsie Tulalo aemaise  i latou uma na molimauina  ma faatumulia lea foi faamoemoe, lea na faataunuuina i le pitonuu o Acacia Ridge.
O le tofa ia Puasegisegi Suitaulalovasa Numia Pritchard na malaga mai Niu Sila e faatautaia le aso, ma na matagofie i le alofa ole Atua. O pelega o fanau ma aiga, lea na faaalia ai foi le valevale alofa e ala i le taumafataga ma teutusi a le aufaigaluega aemaise sa aofia i lea aso tāua.