Ua maua e le All Blacks ma NZ Rugby le taleni a Rieko Ioane mo le isi fa tausaga e oo i le 2022. O lenei feagaiga na sainia i le vaiaso ua tea faatasi ma Akira Ioane. O le a taaalo ai le auuso mo Niu Sila i lea taimi faatasi ai ma le ‘au a le Auckland Blues.  

O le faatasia ai o le auuso i le Blues o se tulaga lelei tele lea mo le NZ Rugby, aemaise ai le taumafaiga e sii i luga le malosiaga o le Blues e tauva ai i le Super Rugby. A’o le ofu uliuli a le All Blacks o le autu moni lea o le naunautaga a le alii taalo. Na ta’ua e Rieko, o le taalo ai mo le All Blacks o lona manao moni lea mo ia mo le taimi nei. “Ua lava le ofu uliuli mo a’u o le a ou nofo ai foi e taalo i Niu Sila,” Rieko Ioane.

O na upu, e tāua tele e tetee ai isi o faaupuga na lafo e isi o alii na taaalo mo le All Blacks e iai Lima Sopoaga. Na ta’ua e Sopoaga lata mai nei, ua lē lava le ofu uliuli e taofia ai tama taaalo mo le aufili a Niu Sila.

Auā e matuā tele naua le seleni e maua a tama talavou pe a o e taaalo i fafo i Europa, Peretania ma Iapani.

Ae o le faaupuga faigofie a Ioane i le feiloaiga ma le autusitala i le vaiaso ua tea, na ia sipelaina ai lona manao ua lava lea mo ia. O le a fai lea faaupuga ma fofo mo le NZ Rugby e tuuesea ai popolega o le a tele ina tuu e tama taalo le manao e taalo mo Niu Sila ae o i fafo e pei o Sopoaga.  O isi faaupuga a Ioane (Twitter), “O le Lakapi e numera tasi lea ia te au, o le taalo ai foi mo le ‘au numera tasi i le lalolagi ua avea lea o se faaneetaga sili ia te au ma ua lava lea.”  O le feagaiga fou e manino lea i le ‘au Super Rugby o le a taaalo ai Rieko ma Akira, o le Auckland Blues lea.

Ae na ta’ua e Rieko na manatu o ia o le a alu ese ma le Blues. Peitai, o le feagaiga fou o le a nofo lelei ai o ia i Aukilani mo le isi fa tausaga.

E foliga e lē o fiafia tele Rieko ma Akira i le tulaga o loo iai le Blues i le taimi nei.

O le mea lea na vaai atu ai i laua i isi ‘au o le Super Rugby e iai le Hurricanes, Chiefs, Highlanders ma le Crusaders.

Na ta’ua e Rieko o se tulaga faigata le vaai atu i le manaia tele o aluga a isi ‘au a’o faaletonu pea le Blues.

Ae o le tumau ai pea i le itumalo na fananau ai e latalata i lo la aiga ma mātua o se tulaga tāua tele foi lea mo laua. Ua lē na’o le NZ Rugby o le a manuia ai ae o le a tumau ai foi ma le auuso i totonu o le Blues.

Ua teena e Rieko le naunau e talepe le matatia o loo umia nei e Doug Howlett mo le All Blacks, o le aofaiga lea o tatao e 49 mo Niu Sila. O loo nofo Ioane ma tatao e 18, e na’o ia foi o le vasega o loo iai nei e mafai ona ausia le matatia a Howlett.

Peitai, na ta’ua e Ioane e lē o se tulaga lea o loo tāua ia te ia i le toe saini ai ma Niu Sila ae na’o le taalo lava lakapi mo le ‘au numera tasi i le lalolagi o le mea tāua tele lea mo ia.