“O se miti na ou faananau i ai lea ua taunuu, na ou filigā e faatalitonu o‘u mātua i le tuliloaina o lo‘u manao”.
O le faamatalaga fiafia lea a le alii talavou o Elijah Tauamiti-Liaina 17 tausaga, o se alo o le atunuu o loo ‘aotauina i le kolisi maualuga o Burnside i Kalaiesetete, ina ua faamanuiaina i le filifilia mo lana konekarate i le taaloga lakapi liki mo le National Rugby League (NRL) i le kalapu Cronulla Sharks.
E pei ona auina atu i le lomiga i le amataga o le tausaga le tauivi ma le sogasogā o lenei tama talavou e finauina lona fia laa atu i le isi sitepu o lenei lava faagatama, e ui lava ina sa eseese a la miti ma lona tamā, Pio Ami Liaina (Solosolo & Tufuiopa).
Na filifilia mai Elijah i lana kalapu o loo taalo ai Riccarton Knights, na taaalo mo le Canterbury Bulls faatasi ai ma le filifilia mo le U16 a Niu Sila, o agavaa ia o lenei alo Samoa na vaavaai i ai le alii faiaoga (coach) ma le peresitene o le Halswell Hornets lea na tofia ai loa e malaga i Ausetalia i le amataga o le tausaga mo trials.
Peitai na toe filifilia e malaga i le faaiuga o Setema mo isi trials, lea la ua faamanuiaina ma mautinoa ai lana konekarate ua sainia mo le Cronulla Sharks.
Na faaalia e Elijah Liaina lona matuā fiafia i lenei sitepu, ona sa tele se aogā ma ni metotia tāua na ia mauaina mai i atunuu i fafo, ae fai foi si vala o ‘au a Ausetalia ma tatou nei ona e fai lava si malolosi o tama sasa‘o.
Ae o se faamatalaga a lona tamā, Pio Liaina sa ia lē manao i ai ona e laualuga i lona manatu ia taalo pea lona atalii i le Iuni lakapi e pei ona sa masani mai ai.
Ae manatua e eseese miti a fanau ma se lagona foi o mātua, o lea la ua matuā iai atoatoa le lagolago faatasi ma lana tapuaiga i Aotearoa nei a o iai fanau i atunuu mamao.
O loo aofia ai i lenei feagaiga ua sainia le faaauauina o lana aoga i le kolisi i Ausetalia, ma o Elijah sa tuai ona malaga ona se‘i faauma ana suega o le NCEA. E faamavae o ia mai lana aoga o avea ma ta‘ita‘i (prefect) o le kolisi.
O le vaveao o le Aso Sa, 21.11.2010 na tuua ai Kalaiesetete mo Ausetalia. Na faailoa mai e Liaina lona agaga faafetai i le Atua i taleni ua foai, ae e pule pea le Atua i lana faasoa, ae o sona lagona ia fai muamua le aoga ia lelei.
Avatu ai ma faamanuiaga a le tatou nusipepa o le Samoa Times, “Bon Voyage Elijah Liaina”!
