Saini feagaiga faapaaga PFL Samoa ma le Neptune

O le faaiuga o le vaiaso na tea nei na faamautu ai le feagaiga o le a galulue faatasi ai le kamupani vaa a le Pasefika, le PFL lea ua pulea ma umia toatasi e Samoa ma le kamupani vaa o le Neptune. O lea feagaiga o le a faagasolo ai galuega o le tautuaina o uafu i atumotu e 15 o le Pasefika e vaa ua i lalo o nei kamupani e lua.

Ua talafeauga lelei lenei feagaiga ma se vaa fou a Samoa o le FORUM Samoa III ua avatu i vaa e ono o le a faaaogā a le Neptune lava latou mo lenei galuega fai faatasi i atumotu o le Pasefika. O le feagaiga lenei na ta‘ua e le Taitaifono o le PFL, le Sui palemia, Afioga Fonotoe Pierre Lauofo o le a vaaia ai le faaopoopo o le numera o femalagaaiga a nei vaa la‘u uta mai i le faa 36 i le tausaga i le faa 42 i le tausaga e tasi. O se siitaga o le a manino le sii ai foi o le tupe maua.

O le alii Palemia o Samoa Susuga Tuilaepa Lupesoliai Sailele Malielegaoi ma sui o le Komiti Faafoe a le PFL e aofia ai ma le Sui palemia, atoa ai sui o le kamupani vaa o le Neptune na sainia le feagaiga, ma o le masina o Iuni e amata ai loa lenei faiga faapaaga i felauaiga o oloa i totonu lava o le Pasefika.

O se laasaga maoa‘e i le taumafaiga a Samoa e faaaogā pea lenei auaunaga ma na ta‘ua e le alii Palemia o lea ua toe agai atu atumotu na faapea ona i totonu o le PFL i tausaga ua mavae e faatalanoa le fia foi ane i totonu o lenei kamupani ae na ta‘ua e le alii Palemia ua see le sa o le PFL i lalo o le vaaiga a Samoa ma o le finau lava o Samoa ua vaaia ai le taumafai e saili se paaga e pei o le Neptune e tele ana vaa la‘u oloa e faatino ai galuega nei.

E faatau mai e le malo o Samoa le PFL o loo i Niu Sila lona ofisa tutotonu ma na ta‘ua e le alii Palemia na gau lava le kamupani i le taimi lea na vaaia ai i Niu Sila.

Ua tele tala ua lafo i le faatau mai ai e Samoa o lenei kamupani vaa o le PFL a o gau e pei ona lagalaga pea e le Tautua Samoa, ma o atumotu o le Pasefika sa fai sea uma i lenei kamupani ua aveese uma a latou sea ma faatau mai ia Samoa ina ua manatu Samoa e tumau le umia ma le pulea o lenei kamupani.

O le mau a le taitai o le Malo, o se kamupani vaa e tāua i fefaataua‘iga aemaise o le atinae o tamaoaiga laiti o atumotu o le Pasefika, e leai ni tupe tetele e totogi ai vaa la‘u oloa tetele o le lalolagi e agai mai i le Pasefika, ae o le pulea lava e Samoa o lenei kamupani e mafai ona feutagai tau o fela‘uaiga e fua i tamaoaiga laiti o le itulagi. Ua fesoasoani tele foi i le taumafaiga a Samoa lea ua iai o se sui fou o le faalapotopotoga o fefaataua‘iga a le Lalolagi. Faaalia e le alii Palemia le tāua o le finau a Samoa i le amataga mai o lenei kamupani vaa ma le pipii ai pea o le igoa o Samoa i lenei atinae, ma o le faafetai o lea ua iai le fesootaiga lenei ua faamausali ai le umia pea e Samoa o lenei kamupani vaa a le Pasefika.

 

Le afioga i le Alii Palemia o Samoa, Komiti Faafoe a le PFL e aofia ai ma le Sui palemia, ma sui o le kamupani vaa o le Neptune na sainia le feagaiga