O loo galulue nisi o le fanau aoga i le aoga tulagalua feololo, le Manurewa Intermediate School i Aukilani i Saute, i se latou poloketi o loo latou sailia ai ni seleni mo nisi o a latou polokalame aogā mo le tausia i se tulaga lelei le aoga, aemaise mo se lelei mo isi fanau o le a fotuai mai i lenei aoga i ni tausaga o i luma.
O le tamaitai faiaoga ia Tanya Kearney, o loo taulamua ma lana vasega i lenei poloketi. O loo latou fausia se fale e faafoliga i se Marae, i totonu o le malae a le aoga, ma faagasolo ai le latou sailiga seleni lenei.
O seleni o le a mafai ona latou aoina mai meaalofa fesoasoani a soo se tasi e foai atu, o le a mafai ona latou faatauina ai ni laau o loo mananao e totō i totonu o le malae a le aoga, aemaise o ituaiga o laau e fua mai ni fua e aogā mo le faaaogāina e fanau aoga, i le lumanai pe a oo ina ola ma fua mai nei laau.
O loo fia faalauiloa atu faalauaitele e nai nei fanau le latou tau alaga mo soo se tasi e fia fai se foai tau seleni mo le latou faamoemoe, ae maua foi sina faamanuiaga e taui mai ai le agalelei faaalia, e ala i le nofosauni o nei fanau aoga e faatino mai na faamanuiaga.
E mafai e le aoga atoa ona faatino mai le Haka mo i latou e foai atu ni seleni pe afai e mananao i le Haka. A lē o lena foi, e iai isi taui laiti e pei o le aumai o se tusi faafetai a le vasega a le tamaitai faiaoga ia Tanya, ia poo isi lava meaalofa e foai mai, ae mafai ona e silafia uma na meaalofa pe a agai i le tuatusi a lana vasega i le upega tafailagi, le www.pledgeme.co.nz/1559
O loo iai le agaga o nei fanau e latou te fia faia ni mea lelei auā le sauniuni atu o le aoga e faafeiloai nisi fanau aoga i le lumanai, e ala i le iai o ni laau aogā nei i totonu o le laufanua o le aoga, aemaise foi o se avanoa lelei lenei e iloa ai le uiga galulue soosootauau ma le faifaimea faatasi o tagata o le pitonuu o Manurewa.
Talosia ia le faamoemoe o nai fanau ina ia iai nisi latou te lagolagoina.
