O le po o le Aso Sa na tuua ai Samoa e le afioga i le Palemia, Susuga Tuilaepa Lupesoliai Sailele Malielegaoi mo nisi suesuega faafomai i lona soifua maloloina, i le tuanai o aso tolu o taofia i le vaega mo gasegase tigaina i le falemai o Tupua Tamasese Meaole i Motootua. O le afioga i le Minisita o le Soifua Maloloina, Tuitama Dr Talalelei Tuitama, o loo malaga ma le Palemia. O le po o le Aso Lulu ua mavae na tuua ai e le Palemia le maota fono i Tiafau mo le maota gasegase a o faagasolo taualumaga a le fono i le afiafi, ma o le po lava lea na taofia ai mo togafitiga.
E ui e lei aumai se faamatalaga aloaia mai le Malo i le mafuaaga na taofia ai ae poo ā foi auga o se gasegase ua aafia ai le taitai o le Malo, ae o molimau ma lipoti na ta‘ua ai o le maualuga o le fiva o le alii Palemia le mafuaaga. O le fiva e mafua mai i se manu‘a i se tasi o ona tama‘ima‘i vae i lona aao taumatau e faapea na aafia i se fao poo le lua vaiaso talu ai, ae sa lē togafitia. O le faamatalaga a se tausi soifua i le maota gasegase o Tupua Tamasese Meaole na ia faailoa ai, o le ‘ona o le manu‘a na mafua ai ona oso le faamalili ma maua le alii Palemia ile fiva.
Sa tautau ona IV ma fai ma ona tui e pei ona faaalia lava e le tausi soifua. E ui ina aafia le Palemia i ia auga ae o le molimau mai le taitai o le Itu Agai le afioga Palusalue Faapo II, sa asiasi i le Palemia i le afiafi o le Aso Tofi na tea nei, o loo manuia le taitai o le Malo. “Sa ma talanoa lava ma fai mai o lona tama‘i vae na tuia i le fao ae ua fai si ona faatamala, ae o loo manuia le Palemia”. O le Aso Sa na faia ai feutanaiga ma tapenaga mo le auina atu i Niu Sila o le taitai o le Malo mo nisi sailiiliga faafomai ona o le fia faamautinoa o le tulaga atoatoa o lona malosi e pei ona ta‘ua e se isi molimau mai le maota gasegase i Motootua i le afiafi o le Aso Sa, 23 o Mati 2014.
E lē o iloa le umi o le a iai le Palemia ma le Minisita o le Soifua Maloloina i Niu Sila, ae o le vaiaso nei o loo faaauau ai fonotaga a le Palemene lea o le a lē auai ai le taitai o le Malo ona o lana siiga gasegase i Aotearoa. Talosia i le alofa o le Atua le sailiga togafiti a le taitai o le malo ma le atunuu ina ia toe faafoisia lona malosi ma toe taliu i Samoa mo le faaauauina o ona tiute faalemalo, aemaise o tiute faamatai i totonu o nuu faapea tiute faaleekalesia.
