“Mafatia tele matou i le manogi leaga o le vai”…Tulima Su‘a
O le tausaga ua mavae na faalauiloa ai e le Pulenuu o Ta‘elefaga i Fagaloa le susuga Tulima Sa Su‘a mafatiaga o lo latou afioaga ona o le faleeletise o loo faatuina ai.
O le vaiaso ua mavae na toe faailoa ai e le pulenuu lea mafatiaga e pei ona feutagai alii ma faipule o le nuu ma le sosaiete o le siosiomaga ma talosagaina ai se fesoasoani.
O le Peresitene o lea faalapotopotoga tau mataupu o le siosiomaga, le fetalaiga ia Fiu Mataese Elisara na ia faailoa i le fono faalauaitele a le faamalu o faalapotopotoga tumaoti i Samoa le SUNGO, le ave e le siosiomaga society o le mataupu i le ofisa o le Amepasa o le Malo o Amerika i Apia, ua talosagaina ai se fesoasoani mo ni tagata popoto faapitoa e faia se suesuega i aafiaga ma mafatiaga o loo feagai ma tagata o Ta‘elefaga.
“Ua leva tele o mafatia lo matou nuu i le manogi leaga e sau mai le vai tuloto o afulilo pe a oo ina maualalo le suavai.
A sau le manogi i le po e matuā lē mafai ona momoe lo matou nuu”. O le faamatalaga lea a le Pulenuu, peitai ua ia faaalia ua leai se manogi i le taimi nei ona ua maea ni a latou feiloaiga ma le pulega o le malosiaga faaeletise le EPC.
“Ioe o le matou feiloaiga na faia na faailoa i ai o le a lē toe logoina latou pe a toe sau le manogi, ae o le a tape loa e lo matou nuu le afi eletise”, na saunoa ai Tulima.
Ua silia i le sefulu tausaga talu ona tatala ma faaaogā le afi eletise e maua mai i le suavai o loo i Ta‘elefaga o se atiina‘e le Malo mo le siitia o le malosi faaeletise e mafai ona faasoasoa atu i le atunuu i Upolu.
Faaalia e Tulima i le fonotaga a sui o le faamalu o faalapotopotoga tumaoti sa autu i le faalauiloaina o aafiaga o le lalolagi i fesuiaiga o le tau, e iai nisi o lo latou nuu ua faaletonu le vaai ma ua faaaogā mata faitautusi ma o loo malosi le talitonuga o le nuu e mafua mai ona o aafiaga o le siosiomaga faalenatura o le nuu ona o le afi eletise.
O se tasi faaletonu na faaailoa e le pulenuu o nisi ua faalēlelei le faalogo ma ua logonoa e mafua i le pa‘ō o le afi eletise.
Ua molimauina foi e le nuu le lē toe tutusa o aso e lei iai se afi eletise ma aso nei pe a fagotaina lo latou gataifale, ona ua iai i’a ma figota ua lē toe maua.
E lei maua se faamatalaga mai le pulega o le EPC e tusa o mafatiaga ua toe lalaga mai e le pulenuu o Ta‘elefaga.
Ae afai ae maua se fesoasoani mai le Malo o Amerika ua ave i ai le talosaga mo se suesuega ma faia ai se lipoti, o le a iloa tonu ai ni mafuaaga o ia faaletonu.
Faaalia e le pulenuu o loo iai tagata o le ofisa o le Matagaluega o le siosiomaga faalenatura a le Malo o loo fai ma malaga atu e mataitu ma suesueina lenei mataupu, peitai e lei oo atu lava se lipoti poo se faamatalaga mai ia suesuega.
