I le televave o tausaga ma mea o tutupu ai ae faapea fesuiaiga o le faatinoga i le tele o isi mau mea ua iai nei, ua toetoe leai se taaloga ua lē oo i ai le sao o tamaitai i lenei vaitaimi.
O le tulaga foi i le lakapi latou ua faapea foi ona alualu i luma le iai o le sao o tamaitai i lenei taaloga, mai lava i le taisefululima, taitoafitu, lakapi-pa‘i.
Ua uma aso ia sa tau saili mai ni tamaitai ae peitai ua tea mālie ese atu lea popolega sa iai. O loo tapena se tasi i taamilosaga o loo faauluulu i ai le Iuni lakapi a Niu Sila, i le tulaga o le tau atinaeina o le Lakapi mo tamaitai. E lē fou lea taamilosaga, ae ua faasolo ina toatele tamaitai e saili ai i nisi o nei avanoa.
I se feiloaiga ma se tasi o tamalii o loo taulamua i le faamaopoopoina o nei tamaitai le susuga ia Nick Bakulich, o le a faia se feiloaiga i le aso 26 o Ianuari 2015 i le malae Lakapi a Manukau Rovers, ma le aso 3 o Ianuari, e tau saili ai nisi mo lea taamilosaga.
O loo iai le naunautaiga e saili nisi mo le Under15, Under19, ma le Open Grade e tausinio ai i lea taamilosaga. O se avanoa lelei foi mo nisi o tamaitai agavaa ma fiafia i lenei taaloga.
O le taamilosaga lenei o le Pacific Aotearoa Cup, e faataunuuina i le aso 14 o Fepuari 2015 i le Waitemata Rugby Club i Waitakere. E moomia le lagolago mai o le atunuu ina ia lava tapena a tatou ‘au ia e tolu mo lea taamilosaga.
Talosia le faamoemoe e pei ona tapena i ai mo le masina fou, alofaaga ma faamanuiaga ia manuia le auai ai o le tatou ‘au i ia taamilosaga.
Mo nisi o faafesili faafesootai Nick Bakulich i le telefoni (09) 376 0799 poo le telefoni feaveai 027 4959 580.
