“O loo iai Faumuina Liuga, poo Misa Telefoni”…Maposua Toleafoa Solomona
Ua tuusao ni lagona faaalia o le taitai o le Pati a Tagata le People’s Party le afioga Maposua Toleafoa Solomona Toailoa, ua ia taua ai le tatau i le faafaletui o le HRPP ona silasila pe le ua tatau ona suia se isi taitaiga fou o le latou Pati Faaupufai. O lipoti e lei mamao tele atu na taua ai le feteenai o lagona ma finagalo faaalia o sui o le HRPP i le fulisia o se vaega toatele e teena le faaiuga a le Fofoga Fetalai na soloia ai nofoa e iva o le Tautua Samoa, o se isi lea faailoga o le amata malepe o le pati. “Ua tatau ona latou iloa lelei o le taitai lea ua mafua ai mea uma, ua mafua ai le vevesi o lenei atunuu”, na saunoa ai Maposua Toleafoa Solomona Toailoa.
“E oo a i le mea lea i le Tautua na fai a faasalalauga a Tuilaepa o ia lea na faia le fesili i le Fofoga Fetalai poo le a le mea ua tuai ai ona fai se faaiuga i le mea lea. O loo manino mai lava la o le afioga lava i le Palemia sa unaia le mea lenei ma ua fevesiai ai lo tatou atunuu. Ua tatau i lou talitonuga i le HRPP ona tilotilo i le leadership o le latou pati. O le la e iai nisi e sili atu foi ona lelei, o le la e iai le afioga Misa, o loo iai le afioga Faumuina Liuga. O isi ia taitai magumagu o le atunuu ua tatau ona tulai mai i le taimi lenei e taitaia le HRPP i le tulaga faaletonu ua iai le taitaiga o le latou pati i le taimi nei.
O loo talitonu Maposua ua matua afaina le tulaga tauleleia o le HRPP i le taimi nei, e le gata o le Tulafono o le suiga o le itu auala, o loo loma le faamasinoga ma le au tetee poo le PASS, ae o le faaiuga a le Fofoga Fetalai ua soloia ma togi i fafo e le faamasinoga maualuga. E le fou i le HRPP le mataupu i se taitai o le latou faafaletui, aua o se tasi lea o vaega sa tele foi i ai tusitusiga ma le fefaaaliaiga o finagalo a o loma le palota tele a le atunuu i le tausaga e 2006. E talitonu se tasi o sui lagolago o le vaega e puipuia aia tatau a tagata na fesiligia i sona lagona faaalia, e tele foi faitioga malolosi na faasagasaga i le taitaiga a Tuilaepa Lupesoliai Sailele Malielegaoi ma sa afea ai foi le fesili lea e tasi pe le ua tatau ona suia le taitai.
O le tali na iai lea na faatoa iloa i le taunuuga o le palota tele o le 2006 ina ua maua e le HRPP nofoa e 30. O faitioga malolosi foi na agai i le alii palemia i lea taimi mai vaega faaupufai fou na faatu ma tauva o latou sui i lea faigapalota e leai lava se eseesega ma faitioga ua toe aliali mai i lenei vaitau a o aga atu i le palota tele o le 2011. Peitai o loo tele vaega o loo faavae ai le finagalo o le taitai o le Pati a Tagata ua tatau ai ona matua silasila totoa le faafaletui a le HRPP i se suiga o le taitai. “Afai ua iai ni mavetevete poo cracks i le latou pati, e leai la se isi tulaga ua tatau ona agai i ai mafaufau o sui o le pati, o le taitai ua mafua ai ia vaega uma ua tutupu”, o se vaega lea o le finagalo Maposua Toleafoa Solomona i se feiloaiga ma tusitala.
E manatu faapito le HRPP
E le sese saunoaga a le Palemia i le faia o ni suiga i le Tulafono o Faigapalota ina ia taofia ai le femoumouai o sui faipule e mafua ina ua toilalo le faaiuga a le Fofoga Fetalai i se tagi a le Tautua Samoa na ave i le faamasinoga. O le finagalo o le taitai o le Pati a Tagata o se isi lea faailoga o le manatu faapito o le taitai o lea pati i le saga faamalosia o lona paoa pe afai e taunuu ia fuafuaga. E oo foi i le mataupu o loo vavao ai Fiti ma saunoaga o loo faafetaui ai e le Palemia o le atunuu taitai o le faigamalo faafitafita a lea motu tuaoi, o loo talitonu Maposua Toleafoa Solomona ua fai si maoae ma ua le silasila ai le alii palemia o Samoa i le ava fatafatafa faa-Pasefika o loo auli ai soo se faaletonu.
O le mataupu foi lea na taua e Maposua o loo pito tasi ai le vaai a Ausetalia ma Niu Sila ia Samoa ma foliga ai o loo lelei mea uma, ae o loo silafia e taitai o ia Malo e tele faaletonu o loo mafatia ai le atunuu. O le suiga o le itu auala o se tasi lea vaega na taua e le taitai o le Pati a Tagata sa tatau ona faaalia i ai ni finagalo o taitai o Ausetalia ma Niu Sila, peitai e le o ano mai ia malo i alaga a le atunuu e taofia lea fuafuaga a le Malo. O le aso 17 o Aukuso 2009 o le a iloiloina ai lea mataupu i le faamasinoga maualuga i Apia. O loo fuafua foi e aumai se faaiuga a le faamasinoga e lei oo i le aso 7 o Setema 2009 e amata ai ona feoai taavale i le itu taumatau o le auala.
