E iai le fesootaiga a le tamaitai pagota ma le alii papalagi na ia totogi aso ni rental cars ona toe faatau atu lea e lenei alii palagi i ni leoleo o Tafaigata e aunoa ma se faatagaga mai kamupani e ona nei taavale totogi aso
Ua faalauiloa e le Pulega o Falepuipui ma le Ola toe Fuataina se sola ese mai i le toese o se tamaitai e suafa ia Vaioleti Stowers sa taofia i le taufaasese ma le gaoi i lea falepuipui.
O le faaaliga na faalauiloa i ofisa faasalalau i le po o le Aso Faraile na tea nei ma le faamatalaga o le Aso Tofi na sola ese ai.
O le po o le Aso Tofi na faailoa ai i luga o Tala Fou a le TV1 se lipoti o ni taavale ua agai se alii papalagi e suafa ia Grant Holland ma totogi aso i faletaavale totogi aso a le Samoana Rentals faapea ai le National Rentals i le talafatai o le taulaga, ona toe agai lea faatau ia taavale e aunoa ma se faatagaga.
O le alii lenei o loo masalomia e leoleo le fesootaiga ma le tamaitai pagota lea ua faalauiloa le sola ese mai i le toese.
O le faamatalaga e uo le alii papalagi lenei ma le tamaitai pagota ma o taavale ia na ia toe faatau ese, na maua uma i le lotoā o le falepuipui i Tafaigata.
O leoleo o le falepuipui ia na faatau i ai e le alii papalagi lenei ia taavale. Faaalia e Leiataua James Arp, le alii pule o le Samoana Rentals, o lona tuafafine e ana le faletaavale totogi aso, o le National Rentals i Fugalei na sue ana taavale e tolu ua totogi aso e le alii papalagi lea o Grant Holland ma ua leiloa. Na logo e se tagata i lea tamaitai i Fugalei – o loo vaaia taavale i Tafaigata ma amata ai loa suesuega o nei taavale.
Ta‘ua e Leiataua na toe faafoi uma mai lava ana taavale na ave e le papalagi lenei ae o lona tuafafine e na o le tasi le taavale ua matuā faaleagaina ua lē toe aogā, sa lavea i se faalavelave ma le isi taavale e tasi.
O lea ua avatu le mataupu i leoleo ae o lea ua sau le faamatalaga ua sola le tamaitai lea e taulai i ai suesuega o taavale gaoi nei ua faatau atu i leoleo o le falepuipui.
