E fa ausiva a Samoa o loo auai mai i le tauvaga siva ua faaigoaina o le hip hop i totonu o Niu Sila i lenei tausaga. O le ausiva mai le afioaga o Vaimoso, ausiva mai le afioaga o Vaiala, o le United o le ausiva lea soo se alalafaga ma le ausiva a le USP i Alafua.
O le auai mai o nei fanau o le naunautaiga lava ia faalautele le latou taleni siva, ona o le latou lagona e lē o uma le tele o tauvaga o loo faatinoina i totonu o Samoa ae o loo ono maua ai foi le avanoa e malaga mai ai i atunuu i fafo e pei ona iai nei tauvaga. I le tauvaga lene i Niu Sila o le faitotoa lea e tatala ai le malaga o le ausiva i le tauvaga tele i Amerika i e ogatotonu o le tausaga.
O ausiva e tolu e pei o le United, ausiva mai Vaimoso ma le USP o le latou taimi muamua lenei ua auai mai ai i lenei faamoemoe, ao le ausiva mai Vaiala o le faalua ai lea ona auai mai i lenei tauvaga tele e pei ona malaga mai ai foi i le tausaga ua mavae.
O Vaiala ua faaono ai lea ona siamupini i tauvaga siva i Samoa i le tauvaga a le TV1, lea foi na toe suipi ai i lenei tausaga. O le tausaga ua mavae sa siamupini ai foi Vaiala i le tauvaga i Niu Sila ma o lea sa maua ai lona avanoa e malaga atu ai i Amerika.
Ma o lea foi la ua toe malaga mai e puipui lona avanoa ma lana siamupini i le tausaga ua mavae i Niu Sila nei.
I le faatalanoaga a le susuga ia Seumanu Fransis Ioane ma le pulega a le ausiva mai Vaiala i luga o le leitio Samoa, na faailoa ai e nei alo o le atunuu le tele o le taleni o loo i alo ma fanau o Vaiala o loo nonofo ma latou, auā pe a fuafua i ai i le tele o tausaga ia o loo manumalo ai i le tauvaga siva a le TV1 i Samoa e mafua lea tulaga lelei ona o le fesuisuiai o taga ma sikaili o le faatulagaina o siva e fanau, o nei metotia uma ma taga eseese o mea e mafaufau lava i ai tamaiti ma tupulaga o le nuu faatasi ai ma le galulue faatasi. A oo foi la ina masii i se tauvaga e le taumate le manuia ma le lelei e oo i ai le ausiva auā o loo tasi le loto o loo faatinoina ai e tamaiti le faamoemoe.
O le ausiva a Vaimoso ua faaigoaina o le “Aiga Dance Crew” o le latou taimi muamua lea ua auai mai ai i Niu Sila i le tauvaga, ma e toavalu i latou o loo malaga mai.
E lei faigofie tapenaga auā e leai ni kamupani sa mafai ona latou lagolagoina le malaga mai o le ausiva, ae sa iai lava le loto tele i le ausiva e tagi ai i lima pasese ma faatau ai toniga auā lo latou faamoemoe poo le sailia lea o se avanoa e ono manumalo ai i le tauvaga i Niu Sila nei ina mafai ona ofi atu i le tauvaga tele i Amerika. E lē o iai foi so latou lagona e o mai e malolo i le tauvaga, ae o lea tuu atu i ai lo latou malosi ma tapenaga e pei ona iai ina ia mafai ona latou ausia le tumutumuga o le faamoemoe e pei ona tuua ai aiga ma nuu ma le atunuu.
O le aso 16, 17 ma le 18 o le masina nei e faia ai lenei tauvaga i le Vodafone Events Centre i Manukau ma o le Aso Lua 16 o Aperila o le a maua ai avanoa o ausiva nei mai Samoa e sisiva ai ona faia lea o le tauvaga mulimuli i le Aso Tofi ma iloa ai le ausiva e siamupini.
